الیکشن کمیشن نے حلقہ این اے 69 منڈی بہاؤالدین کے حتمی نتائج روک لیے

الیکشن کمیشن نے حلقہ این اے 69 منڈی بہاؤالدین کے غیر حتمی نتائج روک لیے۔ منڈی بہاؤالدین کے پی پی 43 کے ریٹرننگ آفیسر کو بھی حتمی نتائج دینے سے روک دیا گیا۔

الیکشن کمیشن آف پاکستان نے متعدد قومی اور صوبائی حلقوں کے غیر حتمی نتائج کا اجرا روک دیا ہے۔ ممبر سندھ نثار درانی اور ممبر بلوچستان شاہ محمد جتوئی پر مشتمل بنچ نے الیکشن کمیشن میں انتخابی عذر کی سماعت کی۔

سماعت کے دوران رکن سندھ نثار درانی نے کہا کہ ہارنے والا جشن منا رہا ہے، جیتنے والا دھاندلی کے الزامات لگا رہا ہے، یہ رویہ کب تک چلے گا۔ اس موقع پر سپیشل سیکرٹری الیکشن کمیشن کا کہنا تھا کہ آر اوز نے بیشتر حلقوں کے حتمی نتائج جاری کر دیے ہیں۔ اس مقام پر نتائج کو روکنا اگلے مراحل میں تاخیر کرے گا۔

الیکشن کمیشن نے این اے 56 راولپنڈی، این اے 53، این اے 52، این اے 57، این اے 60 جہلم، این اے 69 منڈی بہاؤالدین، این اے 126، این اے 127 لاہور اور این اے 87 خوشاب کے حتمی نتائج جاری کرنے سے روک دیا۔ الیکشن کمیشن نے این اے 106 ٹوبہ ٹیک سنگھ کے غیر حتمی نتائج روکتے ہوئے آر او سے رپورٹ طلب کرلی۔

اس کے علاوہ پی پی 7 سرگودھا، پی پی 133 ننکانہ صاحب، پی پی 15 راولپنڈی، پی پی 43 منڈی بہاؤالدین، پی پی 12 راولپنڈی، پی پی 53، پی پی 17، پی پی 4 اٹک، پی پی 121 ٹوبہ ٹیک سنگھ ، پی پی 279 لیہ، پی پی 6 مری کے ریٹرننگ افسران کو بھی حتمی نتائج دینے سے منع کر دیا گیا۔

الیکشن کمیشن نے پی بی 14 نصیر آباد، پی بی 44 کوئٹہ اور پی پی 33 گجرات، پی پی 126، پی پی 128 جھنگ کے غیر حتمی نتائج بھی جاری کرنے سے روک دیا۔