پنجاب میں ڈینگی کی وباء جاری، مزید 82 کیسز رپورٹ

لاہور: پنجاب میں ڈینگی کی وباء نہ رک سکی۔ گزشتہ 24 گھنٹوں کے دوران ڈینگی کے 82 نئے مریض سامنے آئے ہیں۔

محکمہ پرائمری اینڈ سیکنڈری ہیلتھ کیئر نے پنجاب بھر میں ڈینگی کے اعداد و شمار جاری کر دیئے۔ محکمہ صحت کے ترجمان کے مطابق گزشتہ 24 گھنٹوں کے دوران راولپنڈی سے 69 اور لاہور سے 4 ڈینگی کے کیسز رپورٹ ہوئے۔

ترجمان نے بتایا کہ چکوال سے 2 نئے مریض رپورٹ ہوئے ہیں جبکہ گوجرانوالہ، فیصل آباد، بہاولپور، میانوالی، منڈی بہاؤالدین، ساہیوال اور سرگودھا سے ڈینگی کا ایک ایک کیس رپورٹ ہوا ہے۔

ترجمان محکمہ صحت کے مطابق صوبے میں ایک ہفتے کے دوران ڈینگی کے 459 کیسز سامنے آئے ہیں جب کہ رواں سال اب تک ڈینگی کے 1245 کیسز رپورٹ ہوئے ہیں۔ ترجمان کا کہنا ہے کہ ڈینگی سے بچاؤ کے لیے تمام انتظامات مکمل کر لیے گئے ہیں، تمام سرکاری اسپتالوں میں ڈینگی اور دیگر ادویات کا اسٹاک موجود ہے۔