پھالیہ (نامہ نگار) پھالیہ شہر اور گردونواح سے بچوں کے اغوا کا انکشاف۔ سوشل میڈیا پر ایک ویڈیو وائرل ہوئی ہے جس میں حراست میں لیا گیا نوجوان اپنے محلہ کیماں پھالیہ ضلع منڈی بہاؤالدین کا پتہ بتاتے ہوئے پولیس افسر کے سوالات کے جوابات دے رہا ہے۔
نوجوان اپنے ساتھ اپنے والدین اور بہن بھائیوں کی حمایت اور مدد کا بیان دے رہا ہے۔ ملزم کے ویڈیو کلپ میں اقبال جرم کر رہا ہے کہ اس سے قبل اس نے پانچ بچے گود لیے تھے جن میں سے ایک حاملہ خاتون سے گود لیا گیا تھا اور وہ ہر بچے کو پچاس ہزار میں فروخت کرتے ہیں۔
یہ بھی پڑھیں: ڈیفنس لاہور سے اغوا ہونے والا 3 سالہ بچہ منڈی بہاؤالدین سے بازیاب
مزید یہ کہ اس نے پھالیہ شہر محلہ کیماں کے دو اور نوجوانوں کا نام بھی لیا کہ وہ اس کام میں میرے محلہ دار اور ساتھی ہیں۔ ویڈیو کلپ وائرل ہوتے ہی پھالیہ شہر اور ضلع منڈی بہاؤالدین میں اور بیرون ملک مقیم پاکستانیوں میں تشویش کی لہر دوڑ گئی ہے اور والدین میں خوف و ہراس پایا جانے لگا ہے۔
شہر پھالیہ کے لوگوں نے ڈسٹرکٹ پولیس آفیسر منڈی بہاؤالدین احمد محی الدین سے مطالبہ کیا ہے کہ مذکورہ وائرل ویڈیو کلپ کے ملزمان سے تفتیش کی جائے اور تفتیش کا دائرہ وسیع کیا جائے اور ذمہ داروں کے خلاف مقدمہ درج کرکے انہیں فی الفور گرفتار کیا جائے۔
