ڈپٹی ڈائریکٹر ویدر فورکاسٹنگ ڈاکٹر عرفان ورک نے بتایا کہ دسمبر کے مہینے میں ملک میں وقفے وقفے سے بارشوں کے تین سپیل متوقع ہیں۔ بارشیں آئندہ 3 سے 4 روز کے بعد پاکستان میں داخل ہوں گی۔
ڈپٹی ڈائریکٹر محکمہ موسمیات کے مطابق خیبرپختونخوا، گلگت بلتستان اور کشمیر میں بارش ہوگی۔ شمال مشرقی پنجاب اور جنوبی پنجاب کے بعض علاقوں میں بھی بارش کا امکان ہے۔اسلام آباد اور راولپنڈی میں بھی بادل برسیں گے، بارش سے سردی کی شدت میں بھی اضافہ ہوگا۔
ڈاکٹر عرفان ورک نے بتایا کہ رواں ماہ کے وسط سے بارشوں کا ایک اور سلسلہ شروع ہو جائے گا۔ ابھی یہ نہیں کہا جا سکتا کہ دسمبر کے آخر میں بارشیں کتنی شدید ہوں گی۔
دوسری جانب اسلام آباد اور گردونواح میں آج موسم سرد اور خشک رہنے کا امکان ہے۔ لاہور، شیخوپورہ، قصور، حافظ آباد، نارووال میں دھند چھائی رہے گی۔ گوجرانوالہ، گجرات، جہلم، منڈی بہاؤالدین، فیصل آباد میں بھی دھند پڑنے کا امکان ہے۔
محکمہ موسمیات نے اوکاڑہ، جھنگ، ملتان، ساہیوال، بہاولپور، ڈیرہ غازی خان اور رحیم یار خان کو بھی شامل کیا ہے۔ خیبرپختونخوا میں موسم خشک اور سرد ہے، شمالی اضلاع میں شدید سردی ہے۔ سندھ کے بیشتر اضلاع میں موسم خشک رہنے کا امکان ہے۔ سکھر، کشمور، جیکب آباد میں دھند اور سموگ کا امکان ہے۔ بلوچستان کے بیشتر اضلاع میں موسم سرد اور خشک رہے گا۔
