ایڈیشنل ڈپٹی کمشنر جنرل وقار اکبر چیمہ کی زیر صدارت ساتویں ڈیجیٹل زراعت شماری 2024 کے حوالے سے اہم اجلاس منعقد ہوا۔ اجلاس میں ایڈیشنل ڈائریکٹر لائیو سٹاک ڈاکٹر محمد ممتاز بیگ، ڈائریکٹر شماریات اعجاز حسین نقوی، سی ای او ایجوکیشن ضیاءاللہ عباسی، ڈسٹرکٹ ہیلتھ آفیسر ڈاکٹر افتخار، ڈسٹرکٹ پاپولیشن ویلفیئر آفیسر عتیق الرحمٰن، سینسز آفیسر محمد اختر گوندل سمیت متعلقہ محکموں کے افسران نے شرکت کی۔
منڈی بہاءالدین( ایم.بی.ڈین نیوز 30نومبر 2024) اجلاس میں بتایا گیا کہ ڈیجیٹل زراعت شماری یکم جنوری سے 10 فروری 2025 تک کی جائے گی، جس میں ایک فرد کی لسٹنگ سمیت زرعی زمین ، دستیاب زرعی آلات ،لائیو سٹاک، پھلدار پودوں، بیج، ٹیوب ویل، خوراک کی متعلقہ ضروریات، زرعی مشینری کی ملکیت کے بارے میں معلومات اکٹھی کی جائیں گی۔
جس کو مکمل کرنے کیلئے محکمہ ایجوکیشن، لائیو سٹاک، زراعت، ہیلتھ، شماریات اوربہبود آبادی کے 61 ملازمین پر مشتمل ٹیم تشکیل دی جائے گی، جنہیں 23 دسمبر سے 25 دسمبر 2024 تک تین روزہ تربیت فراہم کی جائے گی۔ ایڈیشنل ڈپٹی کمشنر جنرل وقار اکبر چیمہ کاکہنا تھا کہ زراعت شماری ملکی ترقی اور موثر منصوبہ بندی کیلئے بنیاد فراہم کرتی ہے، جس کا بنیادی مقصد ملک میں زرعی پیداوار میں موجودہ اور درکار وسائل سمیت چھوٹے اور بڑے کسانوں کی درجہ بندی اور مشینری کے بارے میں معلومات اور مشکلات معلوم کر کے بہتر منصوبہ بندی کرنا ہے ۔
یہ اقدام ملک کے زرعی شعبے میں ترقی اور معیشت کو مضبوط بنانے کیلئے اہم سنگ میل ثابت ہو گا۔ انہوں نے افسران پر واضح کیا کہ وہ زراعت شماری کے تکنیکی پہلوﺅں اور افادیت کو سمجھتے ہوئے اپنی ذمہ داریاں احسن طریقے سے نبھائیں اور مطلوبہ نتائج کے حصول کیلئے اپنی صلاحیتوں کو بروئے کار لاتے ہوئے زراعت شماری کے کامیاب انعقاد کو یقینی بنائیں۔
