حکومت نے آئندہ 15 روز کے لیے پیٹرولیم مصنوعات کی قیمتوں کا نوٹیفکیشن جاری کردیا۔ وزارت خزانہ کی جانب سے جاری کردہ نوٹیفکیشن میں کہا گیا ہے کہ پیٹرول، ڈیزل، مٹی کے تیل اور لائٹ ڈیزل کی قیمتیں آئندہ 15 روز کے لیے برقرار رکھی گئی ہیں۔
وزارت خزانہ کی جانب سے جاری نوٹیفکیشن کے مطابق آئندہ پندرہ روز کے لیے پیٹرول کی قیمت 255.63 روپے فی لیٹر اور ہائی اسپیڈ ڈیزل کی قیمت 258.64 روپے فی لیٹر مقرر کی گئی ہے۔
نوٹیفکیشن کے مطابق مٹی کے تیل کی فی لیٹر قیمت 168 روپے 12 پیسے جبکہ لائٹ ڈیزل کی قیمت 153 روپے 34 پیسے مقرر کی گئی ہے۔
اس سے قبل وزیراعظم نے پیٹرولیم مصنوعات کی قیمتیں برقرار رکھ کر بجلی صارفین کو ریلیف دینے کا اعلان کیا تھا۔ شہباز شریف نے اپنے بیان میں کہا کہ وہ جلد عوام کو بجلی کی قیمتوں میں بڑا ریلیف دینے جا رہے ہیں اور اس حوالے سے وہ خود قوم سے خطاب کریں گے۔
