ایڈیشنل ڈائریکٹر لائیو سٹاک ڈاکٹر محمد ممتاز بیگ کی ہدایت پر ڈپٹی ڈائریکٹر لائیو سٹاک ڈاکٹر محمد رضوان نے طیب الرحمن اور دیگرکے ہمراہ غلہ منڈی، شفقت آباد، مانگٹ، کنگ روڈ، 2 چک میں پنجاب اینیمل فیڈ سٹف اینڈ کمپاﺅنڈ فیڈ ایکٹ 2016 کے تحت کھل ونڈا شاپس پر چیکنگ کے دوران 24 مختلف دکانداروں سے مختلف فیڈز کے نمونہ جات لے کر کوالٹی کنٹرول لیب راولپنڈی بھجوا دئیے۔
منڈی بہاوالدین ( ایم.بی.ڈین نیوز 03 مارچ 2024 ) ڈپٹی ڈائریکٹر لائیو سٹاک ڈاکٹر محمد رضوان نے بتایا کہ پنجاب اینیمل فیڈ ایکٹ کے تحت رجسٹرڈ ڈیلر ہی فیڈ، کھل بنولہ، ونڈا چوکر وغیرہ فروخت کر سکتے ہیں۔ اگر کسی ڈیلر نے اپنی رجسٹریشن نہیں کروائی تو وہ محکمہ لائیو سٹاک کے دفتر سے اپنی رجسٹریشن کروا کر فیڈ فروخت کر سکتا ہے۔ جن ڈیلرز نے ابھی تک رجسٹریشن نہیں کروائی ان کے خلاف قانونی کاروائی بھی عمل میں لائی جا رہی ہے۔
انہوں نے بتایا کہ فیڈ ملز مالکان کو پابند کیا گیا ہے کہ جانوروں کےلئے بنائی گئی فیڈ کے تھیلوں پر اجزائے ترکیبی، ٹاکسن لیول ، تاریخ ایکسپائری، مینو فیکچرز کے مکمل ایڈریس اور تھیلے کا وزن 20,40 کلو گرام پرنٹ کیا جائے۔ انہوں نے ڈیلرز حضرات کو خبردار کیا کہ وہ ان شرائط کو مد نطر رکھتے ہوئے کسی رجسٹرڈ مل / فرم سے خریداری کریں اوراس کا مکمل ریکارڈ رکھیں۔ کسی کو بھی جانوروں کی جانوں سے کھیلنے کی ہر گز اجازت نہ دی جائے گی۔
