محکمہ موسمیات نے سموگ سے پریشان شہریوں کو بارش کی خوشخبری سنا دی

اسلام آباد: محکمہ موسمیات نے اسلام آباد اور لاہور سمیت مختلف شہروں میں بارش کی پیشگوئی کی ہے۔محکمہ موسمیات کی تازہ ترین رپورٹ کے مطابق وفاقی دارالحکومت لاہور سمیت پنجاب کے مختلف علاقوں میں تیز ہواؤں اور گرج چمک کے ساتھ بارش کا امکان ہے۔ جس سے سموگ اور آلودگی میں کمی آسکتی ہے۔

رپورٹ کے مطابق میانوالی، خوشاب، سرگودھا، گجرات، گوجرانوالہ، منڈی بہاؤالدین، لاہور اور سیالکوٹ میں چند مقامات پر تیز ہواؤں/آندھی اور گرج چمک کے ساتھ بارش ہوسکتی ہے۔ جبکہ بعض علاقوں میں ژالہ باری کا بھی امکان ہے۔

خیبرپختونخوا کے بیشتر اضلاع میں مطلع ابر آلود رہے گا اور مختلف علاقوں میں ژالہ باری کے ساتھ بارش کا امکان ہے۔ پنجاب میں مری، گلیات اور دیگر علاقوں میں بھی بارش کا امکان ہے۔ جبکہ بلوچستان کے بیشتر اضلاع میں موسم خشک رہے گا۔

کشمیر اور گلگت بلتستان میں بھی تیز ہوائیں چلنے اور ہلکی برفباری کا امکان ہے۔ سندھ کے بیشتر اضلاع میں موسم گرم اور خشک رہے گا۔ ان تمام تبدیلیوں سے موسم کی صورتحال کو بہتر بنانے میں مدد ملے گی۔