پنجاب بھر میں گزشتہ 24 گھنٹوں کے دوران بارش اور طوفان کے باعث مختلف حادثات میں 8 افراد جاں بحق اور 37 زخمی ہوگئے۔ ریسکیو پنجاب کے ترجمان کے مطابق زیادہ تر حادثات دیواریں اور چھتیں گرنے کے باعث پیش آئے۔
ترجمان کے مطابق گوجرانوالہ میں بارش کے دوران چھت اور دیوار گرنے کے 8 مختلف واقعات میں 3 افراد جاں بحق اور 14 زخمی ہوگئے۔ جبکہ بارش اور کرنٹ لگنے کے 3 الگ الگ واقعات میں ایک شخص جاں بحق اور 2 زخمی ہو گئے۔ کامونکی میں انڈر پاس میں جمع بارش کے پانی میں ڈوب کر ایک بچہ بھی جان کی بازی ہار گیا۔
پاکپتن میں مکان کی چھت گرنے سے 2 افراد جاں بحق اور 2 زخمی ہوگئے جب کہ ساہیوال کے علاقے کوٹ خادم علی شاہ میں مکان کی چھت گرنے سے خاتون جاں بحق ہوگئی۔ ہڑپہ میں دکان کی چھت گرنے سے تین افراد زخمی ہوگئے۔
لاہور کے علاقے گلشن راوی کے قریب مکان کی چھت گرنے سے 4 افراد زخمی ہوگئے جب کہ منڈی بہاؤالدین کے مختلف دیہات میں بارش کے باعث چھتیں اور دیواریں گرنے سے 8 افراد زخمی ہوگئے۔
خان بابا روڈ الجنت چوک بہاولنگر کے قریب شیڈ گرنے سے ایک شخص زخمی ہو گیا جبکہ سیالکوٹ میں ٹی آر کی چھت گرنے سے 3 افراد زخمی ہو گئے۔ مری اور کہوٹہ میں جزوی لینڈ سلائیڈنگ اور درخت گرنے کے واقعات بھی رپورٹ ہوئے۔
ریسکیو پنجاب کے ترجمان فاروق احمد نے شہریوں سے اپیل کی ہے کہ وہ خراب موسم میں غیر ضروری سفر سے گریز کریں، کمزور اور خستہ حال عمارتوں سے دور رہیں اور کسی بھی ہنگامی صورتحال میں فوری طور پر ریسکیو 1122 سے رابطہ کریں۔
