پنجاب میں پہلی بار سیلاب کی پیشگی وارننگ کے لیے ڈرون سے مانیٹرنگ شروع کر دی گئی ہے۔ پنجاب حکومت کے ترجمان کا کہنا ہے کہ ڈرون مانیٹرنگ سے سیلابی لہروں کی آمد کی نشاندہی ممکن ہو سکے گی۔
پنجاب حکومت کے ترجمان کے مطابق وزیر اعلیٰ مریم نواز کی ہدایت پر تمام بیراجوں، دریاؤں اور ہیڈ ورکس کی ڈرون نگرانی شروع کر دی گئی ہے۔
انہوں نے کہا کہ تریمو بیراج پر ڈرون نگرانی کے دوران پانی کی سطح نارمل پائی گئی۔ پاکپتن میں دریائے راوی اور ستلج میں پانی کی سطح کی ڈرون مانیٹرنگ بھی کی گئی۔
انہوں نے بتایا کہ سرگودھا میں دریائے چناب کے طالب والا پل پر ڈرون مانیٹرنگ کے دوران پانی کا بہاؤ نارمل پایا گیا۔ ہیڈ سدھنائی پر ڈرون مانیٹرنگ کے ذریعے پانی کے بہاؤ کا اندازہ لگایا گیا۔
ترجمان پنجاب حکومت کے مطابق ہیڈ مرالہ پر ڈرون نگرانی کے دوران پانی کا بہاؤ 174000 کیوسک ریکارڈ کیا گیا۔ منڈی بہاؤالدین میں رسول بیراج پر بھی پانی کی نگرانی کی گئی۔
