برصغیر کی مشہور پاپ گلوکارہ نازیہ حسن کی 24 برسی آج 13 اگست بروز منگل کو منائی جا رہی ہے۔نازیہ حسن 3 اپریل 1965 کو کراچی میں پیدا ہوئیں۔ ان کا بچپن کراچی اور لندن کے تعلیمی اداروں میں گزرا۔
1980ء میں نازیہ حسن صرف 15برس کی عمر میں اس وقت شہرت کی بلندیوں پر پہنچ گئیں جب انہوں نے بھارت کے معروف فلم ساز فیروز خان کی فلم ’’ قربانی ‘‘ میں ’’ آپ جیسا کوئی میری زندگی میں آئے تو بات بن جائے ‘‘ گایا ۔ نازیہ حسن نے پی ٹی وی کے کئی پروگرامز اور ٹی وی اشتہارات میں بھی اداکاری کی۔
نازیہ حسن کا اکلوتا بیٹا کون ہے اور کیا کرتا ہے؟
نازیہ حسن نے اپنے بھائی زوہیب حسن کے ساتھ مل کر پاکستانی موسیقی کو ایک نئی جہت دی۔ انہوں نے 80 کی دہائی میں موسیقی میں مغربی انداز متعارف کرایا، جسے ہندوستان، امریکہ، عرب امارات اور لاطینی امریکہ سمیت بیرون ملک پاکستانی نوجوان نسل نے بڑے پیمانے پر قبول کیا۔ اسی وجہ سے نازیہ حسن کا شمار پاپ میوزک کے بانیوں میں ہوتا ہے۔
بلبل ایشیاء نازیہ حسن کی مقبولیت کا اندازہ اس بات سے بھی لگایا جا سکتا ہے کہ آج کے گلوکار بھی نازیہ حسن کے گانے دوبارہ گا کر شہرت حاصل کر رہے ہیں۔ نازیہ حسن 13 اگست 2000 کو لندن کے ایک ہسپتال میں 35 سال کی عمر میں انتقال کر گئیں۔
وہ کینسر کے مرض میں مبتلا تھیں۔ نازیہ حسن کو پرائیڈ آف پرفارمنس، بیسٹ فی میل پلے بیک ایوارڈ، 15 گولڈ ڈسکس سمیت کئی ایوارڈز سے نوازا جا چکا ہے۔
