ڈپٹی کمشنر محمد شاہد نے کہا ہے کہ اشیائے ضروریہ کی قیمتوں کو عوام کی قوت خرید کے مطابق لانے کیلئے تمام وسائل بروئے کار لائے جائیں، پرائس مجسٹریٹس کی کارکردگی اشیائے ضروریہ کی قیمتوں کو عوام کی قوت خرید کے مطابق مستحکم رکھنے سے وابستہ ہے .
منڈی بہاﺅالدین ( ایم.بی.ڈین نیوز 22 جنوری 2021 ) انہوں نے پرائس مجسٹریٹ صاحبان کو ہدایت کی کہ وہ اپنی کارکردگی مزید بہتر بنائیں کیونکہ ان کی حقیقی کارکردگی اشیاء خوردونوش کی قیمتوں کو کنٹرول میں رکھ کر عوام الناس کو فائدہ پہنچانا ہے ، انہوں نے باور کرایا کہ وزیراعظم عمران خان اور وزیراعلیٰ پنجاب سردار عثمان بزدار کی واضح ہدایات کی روشنی میں اشیاء خوردونوش کی قیمتوں میں استحکام کو سوفیصد یقینی بنایا جائے۔
آج کی تازہ ترین ریٹ لسٹ دیکھیں
ان خیالات کا اظہار انہوں نے آج یہاں ڈی سی آفس میں پرائس مجسٹریٹس صاحبان کی کارکردگی کے حوالے سے منعقدہ ڈسٹرکٹ پرائس کنٹرول کمیٹی کے اجلاس کی صدارت کرتے ہوئے کیا ۔ اجلاس میں ایڈیشنل ڈپٹی کمشنر ریونیو احسان الحق ضیاء، اسسٹنٹ کمشنر منڈی بہاﺅالدین کاشف جلیل، اسسٹنٹ کمشنر ملکوال عثمان غنی، ڈی او انڈسٹریز و فوکل پرسن رانا سعید کے علاوہ مجسٹریٹس صاحبان لائیو سٹاک، زراعت، سی او ایم سیز، سیکرٹری مارکیٹ کمیٹیز اور متعلقہ محکموں کے افسران بھی موجود تھے۔
قبل ازیں ڈی او انڈسٹریز رانا سعید نے اجلاس کو بریفنگ دیتے ہوئے بتایا کہ یکم جنوری 2022 سے لے کراب تک25 پرائس مجسٹریٹس صاحبان نے 9 ہزار 142انسپکشنز کیں ۔اوور چارجنگ، ذخیرہ اندوزی، ملاوٹ اور دیگر پرائس کنٹرول ایکٹ کی خلاف ورزیاں پائے جانے پر329 مختلف دکانداروں، بڑے سٹوروں اور سٹاکسٹ کو11 لاکھ 31 ہزارروپے جرمانے کئے گئے جبکہ11 ایف آئی آرز درج کر کے11 افراد کو گرفتار کر کے جیل بھجوا دیاگیا۔
جس پرڈپٹی کمشنر محمد شاہد نے کہا کہ پرائس مجسٹریٹس صاحبان اپنا قبلہ درست کر لیں، کارکردگی نہ دکھانے والوں کیلئے ضلع میں کوئی جگہ نہیں ہے۔ انہوں نے ہدایت کی کہ اجلاس میں شرکت نہ کرنے والے مجسٹریٹس کے خلاف شو کاز نوٹس جاری کئے جائیں۔ انہوں نے کہاکہ بازاروں اور مارکیٹوں میں گھی ، دالوں اور دیگر اشیائے خوردونوش کی مقرر کردہ نرخوں سے زائد فروخت کرنے والوں کے خلاف بلا تفریق کریک ڈاﺅن کیا جائے۔
انہوں نے پرائس مجسٹریٹس صاحبان کو واضح ہدایات جاری کرتے ہوئے کہا کہ عام بازاروں اور مارکیٹوں میں اشیاءضروریہ کی ریٹ لسٹ اور ریٹ بورڈ کو نمایاں جگہوں پر آویزاں نہ کرنے والوں کو بھاری جرمانے کئے جائیں اور ذخیرہ اندوزوں اور ناجائز منافع خوروں کے خلاف ایف آئی آرز درج کروائی جائیں۔ انہوں نے کہا کہ ہمیں حکومتی ہدایات کو سنجیدگی سے لے کر اس پر سوفیصدکارکردگی دکھانا ہوگی۔
