وزیراعلیٰ پنجاب سردار عثمان بزدار کی ہدایت پر اسسٹنٹ کمشنر ملکوال عثمان غنی نے چیف آفیسر میونسپل کمیٹی کے ہمراہ آج علی الصبح تحصیل کی سبزی وپھل منڈی کا اچانک دورہ کیا۔ انہوں نے سبزی و فروٹ منڈی میں بولی کے عمل کا جائز ہ لیا ۔ انہوں نے مختلف دکانوں اور گوداموں کا معائنہ کرنے کے بعد اپنی نگرانی میں بھی پھلوں اور سبزیوں کی نیلامی کروائی۔
منڈی بہاﺅالدین ( ایم.بی.ڈین نیوز 05 اکتوبر 2021 ) انہوں نے آڑھتیوں اور نیلامی کے ممبران سے کہاکہ وہ عوام کی قوت خرید کے مطابق حکومت کے مقرر کردہ ریٹس پر پھل اور سبزیاں فروخت کریں اور صارفین کے حقوق کا خیال رکھیں۔انہوں نے کہا کہ حکومت پنجاب کی ہدایت کے مطابق سبزیوں اور پھلوں کی قیمتوں کو کنٹرول کیاجا رہا ہے۔ پرائس ایکٹ کے تحت کسی کو بھی ذخیرہ اندوزی اور منافع خوری کی اجازت نہیں دی جائے گی اور خلاف ورزی کرنے والوں کے خلاف ایف آرز اور گرفتاریاں عمل میں لائی جائیں گی۔
انہوں نے کہا کہ مہنگائی مافیا کا صفایا ہی مشن ہے ۔ انہوں نے واضح کیا کہ قیمتوں میں بلا جواز اضافے کے منفی رحجان کو سختی سے روکا جائے گا لہذٰا آڑھتی حضرات ناجائز منافع خوری سے اجتناب کریں بصورت دیگر ذخیرہ اندوزوں اور ناجائز منافع خوروں کو قانون شکنی پر سزا بھگتنا پڑے گی۔ انہوں نے سبزی منڈی میں خریداری کیلئے آنے والے دکانداروں اور صارفین سے قیمتوں سے متعلق استفسار بھی کیا جس پر انہوں نے حکومت کی جانب سے پرائس ایمرجنسی کے نفاذ کو ایک احسن اقدام قرار دیا۔ انہوں نے واضح کیا کہ عوام الناس کو ریلیف پہنچانے کے عمل میں کسی قسم کی سستی اور کاہلی کو ہر گز برداشت نہیں کیا جائے گا۔
