نیشنل ایمرجنسی آپریشن سینٹر نے پنجاب اور سندھ میں 27 سے 28 اگست کو بارش کی پیش گوئی کی ہے۔نیشنل ڈیزاسٹر مینجمنٹ اتھارٹی (این ڈی ایم اے) کے مطابق ہوا کا نظام اس وقت بھارت کے گجرات کے قریب ہے۔ سندھ کے علاقوں نگرپارکر، تھرپارکر، ٹھٹھہ، بدین، سجاول، دادو میں 36 سے 48 گھنٹوں کے دوران بارش کا امکان ہے۔
ترجمان این ڈی ایم اے کے مطابق آئندہ 36 سے 48 گھنٹوں کے دوران ٹنڈوالہ یار، ٹنڈو محمد خان، عمرکوٹ، مٹیاری میں موسلادھار بارش کا امکان ہے۔پنجاب کے بیشتر علاقوں میں مون سون کا نظام موجود ہے۔ راولپنڈی، اسلام آباد، پوٹھوہار ریجن، شمال مشرقی پنجاب، وسطی اور جنوبی پنجاب میں آئندہ 36 سے 48 گھنٹوں کے دوران وقفے وقفے سے موسلادھار بارش کا امکان ہے۔
اسی طرح گوجرانوالہ، لاہور، ساہیوال ڈویژن سمیت اٹک، مری، گلیات، چکوال، تلہ گنگ، جہلم، بہاولنگر، بہاولپور، رحیم یارخان، ڈیرہ غازی خان، راجن پور، فیصل آباد، جھنگ، ٹوبہ ٹیک سنگھ، چنیوٹ، ملتان، خانیوال، لودھراں، خانپور، لیہ، سرگودھا، میانوالی، خوشاب، بھکر، کوٹ ادو، منڈی بہاؤالدین اور مظفرگڑھ میں بھی وقفے وقفے سے بارش متوقع ہے۔
این ڈی ایم اے کے ترجمان کا کہنا ہے کہ شدید بارشوں سے شہروں میں طغیانی اور مقامی دریاؤں میں بہاؤ بڑھنے کا خدشہ ہے۔
