تحریک انصاف کا صنم جاوید، عالیہ حمزہ، ڈاکٹر یاسمین راشد سمیت کئی خواتین کارکنوں کو مخصوص نشستوں پر ٹکٹ دینے کا فیصلہ۔
تحریک انصاف نے پنجاب اسمبلی کی مخصوص نشستوں کی ابتدائی فہرست تیار کر لی۔ بانی پی ٹی آئی کی منظوری کے بعد فہرست الیکشن کمیشن میں جمع کرائی جائے گی۔ تحریک انصاف کو خواتین کی 24 اور اقلیتوں کی تین مخصوص نشستیں ملنے کا امکان ہے۔
ذرائع کے مطابق تحریک انصاف کی جانب سے مخصوص نشست کے لیے سعدیہ ایوب، روبینہ خان اور عائشہ بھٹہ کے ناموں پر غور کیا جا رہا ہے۔ صنم جاوید کی بہن فلک جاوید کا نام بھی زیر غور ہے۔ مخصوص نشستوں کے لیے روبینہ رضوان، روبینہ جمیل اور عاصمہ شجاع کے ناموں پر بھی غور کیا جا رہا ہے۔ قومی و صوبائی اسمبلی کے لیے یاسمین راشد، عالیہ حمزہ اور صنم جاوید کے نام تجویز کیے گئے ہیں۔
پی ٹی آئی نے مخصوص نشستوں کے لیے تین رکنی کمیٹی تشکیل دی تھی۔ کمیٹی میں زرتاج گل، کنول شوزاب اور سیمابیہ طاہر شامل ہیں۔ دوسری جانب پاکستان تحریک انصاف نے 38 آزاد ارکان قومی اسمبلی کی فہرست الیکشن کمیشن میں جمع کرا دی ہے۔ مخصوص نشستوں سے متعلق سپریم کورٹ کے فیصلے کے بعد تحریک انصاف نے قومی اسمبلی کے 38 آزاد ارکان کی فہرست الیکشن کمیشن میں جمع کرا دی ہے۔
پاکستان تحریک انصاف کے نمائندے نے ارکان کی فہرست اضافی دستاویزات کے ساتھ الیکشن کمیشن میں جمع کرادی۔ ذرائع کے مطابق 3 آزاد ارکان کے حلف نامے تاحال جمع نہیں کروائے گئے۔ صاحبزادہ محبوب سلطان، مبین عارف اور ریاض فتیانہ بیرون ملک ہیں اس لیے ان کے بیان حلفی جمع نہیں کرائے جا سکے۔ ان 3 ارکان کے پارٹی الحاق کے فارم آج جمع کرائے جائیں گے۔
