سینیگال سے سیالکوٹ پہنچنے والے مسافر کی منڈی بہاءالدین کے ایجنٹ کی نشاندہی

ایف آئی اے امیگریشن نے سیالکوٹ ایئرپورٹ پر بڑی کارروائی کرتے ہوئے شہریوں کو غیر قانونی طور پر سمندر کے راستے یورپ بھجوانے میں ملوث ایک منظم گروہ کو بے نقاب کر دیا۔

ترجمان کے مطابق موریطانیہ سے سیالکوٹ پہنچنے والے مسافر علی اسد سے پوچھ گچھ کی جارہی ہے۔ وہ سینیگال سے فلائٹ نمبر FZ.337 کے ذریعے سیالکوٹ پہنچے۔

ایف آئی اے کے مطابق گجرات کا رہائشی علی اسد حال ہی میں وزٹ ویزے پر فیصل آباد ایئرپورٹ سے سینیگال گیا تھا اور وہاں اس کا رابطہ سفیان نامی ایجنٹ سے ہوا۔ ایجنٹ نے اسے 35 لاکھ روپے میں یورپ بھیجنے کا سودا کیا۔

منڈی بہاءالدین کے تین نوجوان ڈنکی لگاتے ہوئے جاں بحق

موریطانیہ پہنچ کر علی اسد کو سمندر کے راستے غیر قانونی طور پر یورپ بھیجنے کی کوشش کی گئی تاہم اس نے سمندری راستے سے غیر قانونی سفر کرنے سے انکار کر دیا اور وطن واپس آ گئے۔

ایف آئی اے کے مطابق ایجنٹ سفیان کا تعلق منڈی بہاءالدین سے ہے اور اس کے خلاف کارروائی شروع کر دی گئی ہے۔ مسافر کو مزید تفتیش اور ایجنٹوں کی شناخت کے لیے انسداد انسانی سمگلنگ سرکل، گجرات منتقل کر دیا گیا۔

ڈائریکٹر ایف آئی اے گوجرانوالہ زون کے مطابق انسانی سمگلنگ میں ملوث نیٹ ورکس کے خلاف بڑے پیمانے پر کریک ڈاؤن جاری ہے جب کہ غیر قانونی سفری دستاویزات کی سخت جانچ پڑتال کی جارہی ہے۔ انہوں نے شہریوں کو خبردار کیا کہ وہ ایجنٹوں کی چالوں میں نہ آئیں اور بیرون ملک سفر کے لیے قانونی راستے اختیار کریں۔