وفاقی تحقیقاتی ادارے (ایف آئی اے) نے پاسپورٹ دفاتر کے باہر سرگرم ایجنٹ مافیا کے خلاف کارروائی کرتے ہوئے 15 مشتبہ افراد کو گرفتار کر لیا۔
ایف آئی اے گوجرانوالہ زون کے ترجمان کے مطابق گرفتار افراد شہریوں سے جلد پاسپورٹ بنوانے کا وعدہ کرکے غیر قانونی طور پر رقوم بٹور رہے تھے۔
ابتدائی تحقیقات میں کچھ مشتبہ افراد کی سرگرمیوں میں پاسپورٹ آفس کے بعض اہلکاروں کی مبینہ ملی بھگت کے شواہد بھی سامنے آئے ہیں جس پر مزید تفتیش جاری ہے۔
ایف آئی اے کے مطابق کارروائیوں کے دوران گوجرانوالہ سرکل سے 7، گجرات سرکل سے 3 اور سیالکوٹ سرکل سے 5 ملزمان کو گرفتار کیا گیا۔
گوجرانوالہ سرکل کی کارروائی میں گرفتار ملزمان کے خلاف مقدمات درج کر لیے گئے، گجرات سرکل نے منڈی بہاؤالدین پاسپورٹ آفس کے باہر کارروائی کرتے ہوئے تین افراد کو حراست میں لے لیا۔
سیالکوٹ سرکل میں گرفتار ملزمان کے خلاف قانونی کارروائی بھی شروع کر دی گئی ہے۔
ایف آئی اے نے شہریوں سے اپیل کی ہے کہ وہ پاسپورٹ یا دیگر سرکاری امور کے لیے غیر قانونی ایجنٹوں سے رابطہ کرنے سے گریز کریں اور کسی بھی مشکوک سرگرمی کی اطلاع فوری طور پر متعلقہ حکام کو دیں۔
