سٹاک ہوم: سویڈن میں قرآن پاک کو نذر آتش کرنے کی ناپاک جسارت کے بعد پولیس نے اسرائیلی سفارت خانے کے باہر بائبل اور تورات کے نسخے جلانے کی اجازت دے دی۔
عالمی خبر رساں ادارے کے مطابق سویڈن کی پولیس نے کل ہونے والے احتجاجی مظاہرے کا اجازت نامہ جاری کر دیا ہے جس کے تحت اسرائیلی سفارت خانے کے باہر بائبل اور تورات کے صحیفے جلانے کی اجازت ہوگی۔
یہ بھی پڑھیں: منڈی بہاؤالدین پریس کلب کے باہر سویڈن میں قران مجید کی بے حرمتی کیخلاف احتجاجی مظاہرہ
اسرائیلی صدر اسحاق ہرزوگ اور یہودی تنظیموں نے سویڈن کی شدید مذمت کرتے ہوئے کہا کہ اس اقدام کے خلاف سخت احتجاج کیا جائے گا۔ یہ ہرگز قابل قبول نہیں ہے۔
بائبل جلانے کا اعلان کرنے والے منتظمین نے پولیس کو دی گئی درخواست میں کہا کہ اگر قرآن پاک جلانے کی اجازت ہے تو بائبل کو بھی جلانے کی اجازت دی جائے۔ یہ آزادی اظہار کی حمایت میں ہوگا۔
پولیس نے اس 30 سالہ شخص کا نام جاری نہیں کیا جس نے بائبل اور تورات کے طومار کو جلانے کی اجازت کے لیے درخواست دی تھی۔ سویڈش پولیس نے کہا ہے کہ ملک کا آئین عوامی اجتماعات کی اجازت دیتا ہے۔
