اسسٹنٹ کمشنر منڈی بہاءالدین ندیم بلوچ کی زیر صدارت ضلع کونسل ہال میں یوم پاکستان کے حوالے سے پرچم کشائی کی تقریب منعقد ہوئی۔ پولیس کے دستے نے سلامی بھی پیش کی۔ اس موقع پر ضلعی افسران، انجمن تاجران اور الیکٹرانک و پرنٹ میڈیا کے نمائندوں سمیت اساتذہ کی کثیر تعداد بھی موجود تھی۔
منڈی بہاءالدین ( ایم.بی.ڈین نیوز 23مارچ 2025) اسسٹنٹ کمشنر منڈی بہاءالدین ندیم بلوچ کا پرچم کشائی کی تقریب سے خطاب کرتے ہوئے کہنا تھا کہ 23 مارچ شکرانے اور تجدید عہد کا دن ہے، جو ہم سے عظیم مقاصد کے حصول کیلئے تمام توانائیاں بروئے کار لانے کا تقاضا کرتا ہے، آج کے دن ہمیں عہد کرنا ہوگا کہ جس طرح ہمارے بزرگوں نے قربانیاں دے کر الگ وطن حاصل کیا۔
اسی جذبے کے ساتھ ہم پاکستان کی ترقی اور خوشحالی کے لئے کام کریں گے۔ ان کا کہنا تھا کہ 23 مارچ کا دن ہماری تاریخ کا ایک سنہری دن ہے جو ہمیں اپنے بزرگوں کی تحریک پاکستان اور قیام پاکستان کیلئے کی گئی جدوجہد اور اس کیلئے دی گئی قربانیوں کی یاد دلاتا ہے۔
1940 میں اسی روز دو قومی نظریہ کے تحت حصول پاکستان کی قرارداد پیش کی گئی۔ جو ہمارے عظیم وطن کے قیام کی بنیاد بنی اور ہم آج ایک آزاد وطن میں سانس لے رہے ہیں۔
ان کا کہنا تھا کہ ہمیں اس عہد کی تجدید کرنا ہے کہ جن مقاصد کیلئے اس وطن کو حاصل کیا گیا ہے ان کے حصول کیلئے تمام توانائیاں بروئے کار لانا ہوں گی۔ تقریب کے اختتام پر واک منعقد ہوئی اور ملک و قوم کی خوشحالی اور سلامتی کیلئے دعا بھی کی گئی۔
