پاکستان ٹیلی کمیونیکیشن اتھارٹی (پی ٹی اے) نے ملک بھر میں واٹس ایپ صارفین کے لیے انتہائی اہم اور فوری الرٹ جاری کیا ہے، جس کے تحت غیر فعال یا غیر رجسٹرڈ سم کارڈز پر چلنے والے واٹس ایپ اکاؤنٹس کو بند کرنے کا فیصلہ کیا گیا ہے۔ پی ٹی اے نے صارفین کو خبردار کیا ہے کہ وہ اپنے اکاؤنٹس کا اسٹیٹس فوری طور پر چیک کریں تاکہ کسی بھی ناگہانی پریشانی سے بچا جا سکے۔
پاکستان ٹیلی کمیونیکیشن اتھارٹی کے مطابق، ایک سم پر چلنے والے تمام واٹس ایپ اکاؤنٹس جو مستقل طور پر غیر فعال ہیں، پی ٹی اے یا موبائل کمپنی کی جانب سے بلاک کر دی گئی ہیں، غیر فعال کر دی گئی ہیں، یا صارف کے نام پر رجسٹرڈ نہیں ہیں جلد ہی ناقابل رسائی ہو سکتے ہیں۔
پی ٹی اے نے تمام صارفین کو سختی سے ہدایت کی ہے کہ وہ اپنے واٹس ایپ نمبر کو فوری طور پر کسی ایسی سم سے لنک کریں جو ان کے اپنے نام سے فعال اور رجسٹرڈ ہو۔ صارفین کو فوری طور پر تصدیق کرنی چاہیے کہ جس سم پر ان کا موجودہ واٹس ایپ نمبر بنایا گیا ہے وہ کام کرنے کی حالت میں ہے یا نہیں۔
اس حوالے سے پی ٹی اے کا کہنا ہے کہ یہ اقدامات سیکیورٹی اور قانونی ضابطوں کو یقینی بنانے کے لیے کیے جا رہے ہیں۔ اگر آپ کا واٹس ایپ اکاؤنٹ بلاک شدہ یا غیر رجسٹرڈ سم پر چل رہا ہے تو یہ کسی بھی وقت خود بخود لاگ آؤٹ ہوسکتا ہے، جس کے بعد آپ کا قیمتی ڈیٹا اور چیٹس کے ضائع ہونے کا خطرہ ہے۔ لہذا، آپ کا واٹس ایپ اکاؤنٹ اچانک بلاک یا لاگ آؤٹ ہونے سے پہلے اپنے نمبر کو قانونی اور رجسٹرڈ سم میں منتقل کریں۔
