منڈی بہاوالدین ( ایم۔بی۔ڈین نیوز 19 اکتوبر 2023 ) ای روزگار مینیجر منڈی بہاﺅالدین نوید اقبال نے بتایا ہے کہ گورنمنٹ پوسٹ گریجویٹ کالج منڈی بہاوالدین میں ای-روزگار ٹریننگ پروگرام کے اگلے بیچ کے داخلے جاری ہیں۔
ای-روزگار ٹریننگ پروگرام یوتھ افیئرز اینڈ سپورٹس ڈیپارٹمنٹ اور پنجاب انفارمیشن ٹیکنالوجی بورڈ کا ایک فلیگ شپ پراجیکٹ ہے، جو نوجوانوں کو ڈیجیٹل سکلز اور فری لانسنگ کی مفت تربیت فراہم کر رہا ہے تاکہ نوجوان اپنے گھر بیٹھے آن لائن اور باعزت طریقے سے پیسے کما سکیں۔ انہوں نے بتایا کہ سولہ سالہ تعلیم یافتہ نوجوان ای-روزگار ٹریننگ پروگرام کے ذریعے پیش کردہ سات مختلف کورسز میں سے کسی ایک میں شامل ہو سکتے ہیں۔
E-Rozgaar training center in Mandi Bahauddin
ہر کورس میں نوجوانوں کو فری لانسنگ کی تربیت بھی دی جائے گی تاکہ امیدوار سیکھے ہوئے ہنر کو استعمال کرکے آن لائن کما سکیں۔ ای روزگار مینیجر نے بتایا کہ اب تک 58 ہزار سے زائد نوجوان اس پروگرام سے تربیت حاصل کر کے فری لانسنگ کے ذریعے ماہانہ اچھی رقم کما رہے ہیں۔ نوید اقبال نے بتایا کہ دلچسپی رکھنے والے امیدوار داخلہ کے لیے اپنی آن لائن درخواست ویب سائٹ www.erozgaar.pitb.gov.pk پر جمع کر سکتے ہیں۔
