اسلام آباد: کابینہ کی اقتصادی رابطہ کمیٹی نے گھریلو، تجارتی اور صنعتی صارفین کے لیے گیس کے نرخوں میں 193 فیصد اضافے کی منظوری دے دی۔ گیس کے نئے نرخوں کا اطلاق یکم نومبر 2023 سے ہوگا۔
گیس ٹیرف میں اضافے کی منظوری نگراں وزیر خزانہ ڈاکٹر شمشاد اختر کی زیر صدارت کابینہ کی اقتصادی رابطہ کمیٹی (ای سی سی) کے اجلاس میں دی گئی۔
اجلاس میں وزارت صنعت و پیداوار، وزارت توانائی و پیٹرولیم، وزارت نیشنل فوڈ سیکیورٹی اینڈ ریسرچ، زلزلہ کی تعمیر نو اور بحالی اتھارٹی (ایرا) اور وزارت خزانہ کی جانب سے پیش کیے گئے مختلف ایجنڈے کے نکات اور سمریوں پر غور کیا گیا۔
مالی سال 2023-24 کے لیے قدرتی گیس کی فروخت کی قیمتوں پر نظرثانی کے حوالے سے وزارت توانائی (پیٹرولیم ڈویژن) کی طرف سے جمع کرائی گئی۔ سمری پر غور کرنے کے بعد وزارت کی طرف سے پیش کردہ ٹیرف شیڈول کے مطابق سمری کی منظوری دی گئی۔ جس کا اطلاق یکم اکتوبر 2023 کے بجائے یکم نومبر 2023 سے ہوگا۔
