ڈپٹی کمشنر طارق علی بسرا نے کہا ہے کہ آٹے اور چینی کے مقرر کردہ نرخوں سے زائد قیمت پر فروخت کو کسی بھی صورت برداشت نہیں کیا جائے گا، ایسی شکایات موصول ہونے پر پرائس ایکٹ کے تحت جرمانے کے ساتھ گرفتاری بھی عمل میں لائی جائے گی۔
منڈی بہاءالدین ( ایم.بی.ڈین نیوز 16 اکتوبر 2021) انہوں نے کہا کہ حکومت نے عوام الناس کی سہولت کیلئے ضلع بھر کی مخصوص دکانوں، ہول سیل ڈیلروں اور سستے سہولت بازاروں میں 20 کلو آٹے کے تھیلے کی قیمت 1100 روپے جبکہ 10کلو آٹے کے تھیلے کی قیمت 550 روپے مقرر کر رکھی ہے اور اس پر عملدرآمد کو بھی یقینی بنایا جا رہا ہے۔ اسی طرح چینی سستے سہولت بازاروں میں 87 روپے کلو جبکہ مخصوص دکانوں اور ہول سیل ڈیلروں پر 90روپے فی کلو کے حساب سے دستیاب ہے۔
ان خیالات کا اظہار انہوں نے آج یہاں ڈی سی آفس میں مارکیٹ اور سہولت بازاروں میں سستے آٹے اور چینی کی دستیابی کے حوالے سے منعقدہ اجلاس کی صدارت کرتے ہوئے کیا۔ اجلاس میں ایڈیشنل ڈپٹی کمشنر فنانس حافظ غلام مرتضیٰ، اسسٹنٹ کمشنر منڈی بہاﺅالدین امتیاز علی بیگ، اسسٹنٹ کمشنر پھالیہ ساجد منیر کلیار، اسسٹنٹ کمشنر ملکوال عثمان غنی، ڈسٹرکٹ فوڈ کنٹرولر محمد ارشد تارڑ، ڈی او انڈسٹریز رانا سعید اور دیگر متعلقہ محکموں کے افسران بھی موجود تھے۔
اجلاس میں ڈسٹرکٹ فوڈ کنٹرولر اور ڈی او انڈسٹریز کی جانب سے سہولت بازاروں، مارکیٹ اور شہر کی مخصوص دکانوں پر آٹے اور چینی کی دستیابی کے حوالے سے رپورٹ پیش کی گئی ۔ جس پر ڈپٹی کمشنر طارق علی بسرا نے کہا کہ حکومت کی اولین ترجیح اشیائے ضروریہ بالخصوص آٹا، چینی، دالیں، سبزیاں مقررہ نرخوں پر با آسانی اور وافر مقدار میں دستیاب کرانا ہیں جس کیلئے تمام ممکنہ وسائل اور اقدامات بروئے کار لائے جا رہے ہیں۔
انہوں نے ڈسٹرکٹ فوڈ کنٹرولر اور پرائس مجسٹریٹس صاحبان کو ہدایت کی کہ وہ دکانداروں کو اس بات کا پابند کریں کہ وہ اشیائے خوردونوش بالخصوص آٹے اور چینی کے سرکاری ریٹ لسٹوں کو نمایاں جگہوں پر آویزاں کریں۔ انہوں نے واضح کیا کہ ضلعی اور متعلقہ محکموں کے افسران باقاعدگی سے سبزی منڈیوں ، عام بازاروں اور تجارتی مراکز کے دورے کر رہے ہیں اور آٹا ، چینی سمیت دیگر اشیائے ضروریہ کی تسلسل کے ساتھ مانیٹرنگ کر رہے ہیں تا کہ کسی بھی قسم کی عدم دستیابی اور قلت سے بر وقت نبٹاجا سکے۔
