منڈی بہاؤلدین ( ایم.بی.ڈین نیوز یکم دسمبر 2021) ڈپٹی کمشنر احسان الحق ضیاء نے کہا ہے کہ ریونیو عوامی خدمت کچہریوں میں عوام کے ریونیو سے متعلقہ تمام مسائل ایک ہی چھت کے نیچے ترجیحی بنیادوں پر حل کئے جا رہے ہیں۔ انہوں نے بتایا کہ ضلع کی ہر تحصیل ہیڈکوارٹرز میں بھی ہر ماہ کے پہلے دو دن باقاعدگی سے خدمت کچہریوں کا انعقاد تسلسل سے کیا جا رہا ہے جس کا بنیادی مقصد عوام اور ضلعی انتظامیہ کے مابین روابط کو مستحکم بنانے کے ساتھ ساتھ ان کے درپیش ریونیو مسائل کو موقع پر حل کرنا ہیں۔
یہ بھی پڑھیں: منڈی بہاءالدین کے نئے ڈپٹی کمشنر نے اپنے عہدے کا چارج سنبھال لیا
ان خیالات کا اظہار انہوں نے آج یہاں ڈی سی آفس میں منعقدہ ریونیو عوامی خدمت کچہری میں خطاب کرتے ہوئے کیا۔ اس موقع پر تحصیلدار، نائب تحصیلدار وقار احمد، لینڈ ریکارڈ سنٹر، ریونیو افسران، ریڈر ٹو تحصیلدار عرفان گوندل کے علاوہ سائلین کی کثیر تعداد بھی موجود تھی۔
اس موقع پر ڈپٹی کمشنر احسان الحق ضیاء نے کہا کہ ریونیو عوامی خدمت کچہریوں کا انعقاد وزیراعلیٰ پنجاب کا عوام دوست اقدام ہے اور شہریوں نے ان خدمت کچہریوں پر اپنے بھر پور اعتماد کا اظہار کیا ہے۔ انہوں نے بتایا کہ ان کچہریوں میں پٹواری سے لیکر ڈپٹی کمشنر تک عوام الناس کو فرد کے اجراء ، درستگی ریکارڈ، انتقالات کے اجراء، انکم سرٹیفکیٹ، معائنہ ریکارڈ، رجسٹری، ڈومیسائل کا اجراء اور ریونیو سے متعلقہ دیگر درپیش مسائل کے حل کے حوالے سے ایک ہی چھت کے نیچے الگ الگ کاؤنٹرز پر خدمات مہیا کرنے کیلئے موجود ہیں ۔
انہوں نے مزید بتایا کہ شہریوں کو ریونیو سے متعلقہ مسائل کے حل کے حوالے سے یہ خدمات ہر ماہ کے پہلے دفتری دن کو صبح 10بجے سے سہ پہر 3بجے تک مہیا کی جاتی ہیں ۔ ڈپٹی کمشنر نے ریونیو عوامی خدمت کچہری میں آئے ہوئے سائلین سے خود بھی توجہ اور خلوص سے ان کے مسائل سنے اور ان کے حل کے لئے موقع پر احکامات جاری کئے۔
خدمت کچہری میں آغاز سے لے کر اختتام تک 24آنے والے سائلین نے اپنے مختلف مسائل کے حوالے سے درخواستیں پیش کیں جنہیں وہاں پر افسران کی موجودگی میں عملہ نے فوری طور پر کاروائی کر کے موقع پر نبٹا دیا جبکہ دیرینہ مسائل والی درخواستوں کو ایک دو روز میں حل کرنے کی یقین دہانی کروائی گئی۔
٭٭٭٭٭
