نئے ڈی ایچ کیو اسپتال کو مکمل طور پر فعال کر دیا گیا ہے پرانے ہسپتال کو سٹی اسپتال میں تبدیل کرنے کی لئے پنجاب حکومت کو لکھا جائے گا، ڈپٹی کمشنر

منڈی بہاﺅالدین( ایم.بی.ڈین نیوز 16 جنوری 2021 ) ڈپٹی کمشنر طارق علی بسرا نے پرانے ڈسٹرکٹ ہیڈ کوارٹر اسپتال کا اچانک دورہ کیا ۔ سی ای او ہیلتھ (ڈی ایچ اے) ڈاکٹر محمد الیاس گوندل ، میڈیکل سپرنٹنڈنٹ اور میڈیا نمائندگان کی بڑی تعداد بھی موجود تھی ۔ڈپٹی کمشنر نے ہسپتال کے وارڈز اور فارمیسی سمیت مختلف شعبوں کے علاوہ صفائی ، ستھرائی اور سکیورٹی کا جائزہ لیا اور لواحقین سے مریضوں کو فراہم کی جانے والی طبی سہولیات کے بارے میں بھی دریافت کیا ۔

سی او ہیلتھ اور ایم ایس نے ڈسٹرکٹ ہیڈکوارٹر ہسپتال اور ہسپتال میں ایمرجنسی سہولیات پر تفصیلی بریفنگ دی۔ڈپٹی کمشنر نے پرانے ہسپتال کی ایمرجنسی میں مریضوں کیلئے دو بیڈز سے چھ بیڈز کرنے کی بھی ہدایت کی۔ اس موقع پر ڈپٹی کمشنر نے میڈیا نمائندگان سے گفتگو کرتے ہوئے کہا کہ وزیراعلیٰ پنجاب سردار عثمان بزدار کی خصوصی ہدایت پر ضلع بھر کے سرکاری ہسپتالوں میں عوام الناس کو صحت کی بہترین، بر وقت اور مفت طبی سہولیات فراہم کرنا ضلعی انتظامیہ کی اولین ترجیح ہے، انہوں نے کہا کہ تمام ہسپتالوں بالخصوص سرکاری ہسپتالوں میں مریضوں کو بہترین علاج معالجہ تشخیص کے ساتھ مفت ادویات اور دیگر طبی سہولیات کی فراہمی کو یقینی بنایا جا رہا ہے۔

انہوں نے کہا کہ نئے ڈی ایچ کیو اسپتال کو مکمل طور پر فعال کر دیا گیا ہے اور پرانے ہسپتال کو سٹی اسپتال میں تبدیل کرنے کی لئے پنجاب حکومت کو لکھا جائے گا۔ انہوں نے بتایا کہ پرانے ڈسٹرکٹ ہیڈکوارٹر ہسپتال کی ایمرجنسی پہلے کی طرح فنکشنل ہو گی اور ایمرجنسی میں طبی سہولیات پہلے کی طرح ہی دستیاب ہوں گی۔ اسی طرح ہسپتال میں ڈائلیسز یونٹ، فارمیسی اور لیبارٹری سمیت دیگر شعبہ جات بھی کام کرتے رہیںگے۔ انہوںنے بتایا کہ مریضوں کو پرانے ڈی ایچ کیو سے نئے ڈی ایچ کیو اسپتال ایمرجنسی میں لے جانے کیلئے ہر وقت ایک ایمبولینس بھی موجود ہوگی۔انہوں نے کہا کہ میڈیا کی جانب سے مختلف اداروں کو درست سمت میں چلانے کیلئے مفید معلومات اور آگاہی ملتی ہے جس سے اصلاح احوال کو بہتر بنانے میں بڑی مدد ملتی ہے۔