ریسکیو 1122 کا سینئر اہلکار ڈیوٹی کے دوران وفات پا گیا، اعزاز کیساتھ آبائی گائوں تدفین

منڈی بہاﺅالدین( ایم.بی.ڈین نیوز 28جنوری 2021 ) ریسکیو 1122 کے سینئر اہلکار گلزار حسین آف واڑہ بالیاں کی پورے اعزاز کے ساتھ تدفین کر دی گئی۔نماز جنازہ میں محکمہ کے افسران ، اہلکاران کے علاوہ عمائدین شہر اور عوام الناس کی کثیر تعداد شریک تھی۔

درین اثناءگلزار حسین آف واڑہ بالیاں جو کہ عرصہ دراز سے ریسکیو 1122میں خدمات سر انجام دے رہے تھے۔ دوران ڈیوٹی اچانک وفات پا گئے تھے۔ جنہیں بعد ازاں پورے اعزاز کے ساتھ ان کے آبائی قبرستان میں سپرد خاک کر دیا گیا۔ اس موقع پر ڈسٹرکٹ ایمرجنسی آفیسر عمران خان اور محکمے کے دیگر افسران و اہلکاران بھی موجود تھے۔

میت کو ریسکیو اہلکاران کے چاک و چوبند دستے نے سلامی پیش کی اور پھالوں کی چادر بھی چڑھائی گئی۔بعد ازاں اپنے تعزیتی بیان میں ایمرجنسی آفیسر عمران خان نے کہا کہ مرحوم گلزار حسین آف واڑہ بالیاں اعلیٰ مخلص، جفاکش اور محنتی انسان تھے۔انہوںنے کہا کہ ہمیشہ وقت سے پہلے ڈیوٹی پر پہنچنا ، اپنا کام دیانت داری سے انجام دینا ، صاف ستھرا یونیفارم زیب تن کر کے آفس آنا اور ساتھی ریسکیورز کے ساتھ نہایت محبت سے پیش آنا گلزار حسین کا خاصہ تھا۔

ہم گلزار حسین صاحب کی کمی ہمیشہ محسوس کریں گے۔گلزار حسین اپنی ذات میں ایک مکمل شخصیت تھے۔اللہ پاک ان کے صغیرہ کبیرہ گناہوں سے در گزر فرما کر انسانیت کی خدمت کرنے والے اس عظیم ریسکیور کے درجات بلند فرمائے۔آمین