ڈپٹی کمشنر کی ہدایت پر اسسٹنٹ کمشنر پھالیہ ساجد منیر کلیار نے علی الصبح پھل و سبزی منڈی کا اچانک دورہ کیا، انہوں نے سبزی و فروٹ منڈی میں مختلف سبزیوں اور پھلوں کی نیلامی کے عمل کا جائزہ لیا ۔ انہوں نے سبزیوں اور پھلوں کی دستیابی ، قمیتوں اور ریکارڈ کو چیک کیا ۔
منڈی بہاءالدین( ایم.بی.ڈین نیوز 29ستمبر 2021) انہوں نے سبزی منڈی میں خریداری کیلئے آنے والے دکانداروں اور صارفین سے قیمتوں اور کوالٹی سے متعلق استفسار بھی کیا جس پر وہاں موجود صارفین نے اپنے اطمینان کا اظہار کیا۔انہوں نے سیکر ٹری مارکیٹ کمیٹی کو تاکید کی کہ بو لیوں کے اوقات میں موقع پر مو جودرہ کر تمام کاروائی کو مانیٹر کیا جائے اور اس امر کو یقینی بنایا جائے کہ کسی شے کی قیمت میں بے جا اضافہ نہ ہو ۔ انہوں نے عوامی طلب کی بنیاد ی اشیاء کی دستیابی ، معیار اور بولی کو بھی چیک کیا .
ا نہوں نے کہا کہ وزیراعظم پاکستان اور وزیراعلیٰ پنجاب کی ہدایت پر سبزیوں و پھلوں کی قیمتوں کو عوام الناس کو براہ راست ریلیف پہنچانے کیلئے کنٹرول کیا جا رہا ہے اورمنڈی میں نیلامی کے عمل کی مسلسل مانیٹرنگ کی جا رہی ہے یہی وجہ ہے کہ تمام سبزیوں اور پھلوں کی قیمتوں کو حکومت کے مقرر کردہ نرخوں پرعملدرآمد کروایا جا رہا ہے جس کے ثمرات عوام تک پہنچ رہے ہیں۔ انہوں نے آڑھتیوں اور نیلامی کے ممبران پر واضح کیا کہ صارفین کے حقوق کا خیال کرتے ہوئے عوام کی قوت خرید کے مطابق حکومت کے مقرر کردہ ریٹس پر ہی پھل اور سبزیاں فروخت کریں بصورت دیگر قانون شکنی پر سزا بھگتنا پڑے گی۔
بعد ازاں اسسٹنٹ کمشنر نے تحصیل پھالیہ کے مختلف علاقوں میں اپنی نگرانی میں صفائی ستھرائی، نکاسی آب اور نالوں کی صفائی کا کام مکمل کروایا۔ انہوں نے میونسپل عملے کو صفائی ستھرائی اور کوڑا کرکٹ کو محفوظ طریقے سے ٹھکانے لگانے کے حوالے سے ضروری ہدایات بھی جاری کیں۔ اے سی نے کہا کہ ڈپٹی کمشنر کی ہدایت کے مطابق گلی محلوں کی نالیوں ، نالوں کی صفائی اور کوڑا کرکٹ اٹھانے کے علاوہ دیگر میونسپل سروس کی فراہمی کیلئے تمام وسائل بروئے کار لائے جا رہے ہیں تاکہ گندگی کی وجہ سے لوگوں کو درپیش مشکلات فوری طور پر ختم کی جاسکیں۔
