انچارج ایجوکیشن ونگ ٹریفک پولیس جاوید عباس نے کہا ہے کہ ٹریفک قوانین پر عمل کرنا مہذب قوموں کا شیوہ ہے، ٹریفک قوانین پر عمل کرکے ہم اپنی اور دوسروں کی جانوں کی حفاظت کر سکتے ہیں۔
منڈی بہاﺅالدین ( ایم.بی.ڈین نیوز 23 اکتوبر 2021) ان خیالات کا اظہار انہوں نے ضلع کے مختلف سکولوں میں طلباء کو جبکہ مختلف بس سٹینڈز اور پبلک مقامات پر ڈرائیورز، کنڈیکٹرز اور عوام الناس کو ٹریفک رولز آگاہی مہم کے حوالے سے لیکچرز دیتے اور پمفلٹس تقسیم کرتے ہوئے کیا۔ ایجوکیشن ونگ کے افسران محمد عارف اور دیگربھی موجود تھے۔
اس موقع پر انچارج ایجوکیشن ونگ جاوید عباس نے کہاکہ بڑے بڑے حادثات کی وجہ چھوٹی چھوٹی ٹریفک قوانین کی غلطیاں ہوتی ہیں۔کچھ وقت دیر سے پہنچ جانا نہ پہنچنے سے کہیں بہتر ہے۔ والدین اپنے بچوں پر نظر رکھیں اور ون ویلنگ کرنے سے روکیں کیونکہ ون ویلنگ انتہائی خطرناک اور جان لیوا عمل ہے۔ اوور لوڈنگ اور اوورسپیڈنگ کسی صورت برداشت نہیں کی جائیگی۔ ٹریفک کی روانی کو بہتر اور جاری رکھنے کیلئے ٹریفک پولیس ہر وقت اپنے فرائض سرانجام دے رہی ہے۔
انہوں نے مذید کہا کہ حکومتی ہدایات کے مطابق سموگ آگاہی مہم شروع کی جاچکی ہے، عوام الناس سموگ کے دوران احتیاطی تدابیر اپناتے ہوئے غیر ضروری سفر سے گریز کریں۔ آنکھوں کی حفاظت کیلئے چشمے کا استعمال کریں اور فیس ماسک کا استعمال بھی لازمی کریں۔ فوگ لائٹس کا استعمال کریں، دوران دھند سموگ گاڑیوں کی اوور ٹیکنگ اور اوور سپیڈنگ سے گریز کریں اور گاڑی کی اسپیڈ کم رکھیں ۔جس سے اپنی اور دوسروں کی زندگیوں کو بچانے میں کامیاب رہیں گے۔
