سینئر ممبر بورڈ آف ریونیو /ریلیف کمشنر پنجاب بابرحیات تارڑ نے کہا ہے کہ ریونیو عوامی سروسز کے ذریعے شہریوں کے مسائل کا فوری حل یقینی بنایا جا رہا ہے، قدرتی آفات سے نمٹنے کیلئے صوبے کے تمام اضلاع میں ڈسٹرکٹ ایمرجنسی آپریشن سنٹرز کو فعال کر دیا گیا ہے اور یہاں بہترین سہولیات کی فراہمی اولین ترجیح ہے.
منڈی بہاﺅالدین( ایم.بی.ڈین نیوز یکم فروری 2022 ) ان خیالات کا اظہار انہوں نے منڈی بہاﺅالدین میں ریونیو عوامی سروسز اور ڈسٹرکٹ ایمرجنسی آپریشن سینٹر کے افتتاح کے موقع پر کیا۔ اس موقع پرڈپٹی کمشنر محمد شاہد ، ایڈیشنل ڈپٹی کمشنر ریونیو ڈاکٹر احسان الحق ضیاء، تینوں تحصیلوں کے اسسٹنٹ کمشنرز منڈی بہاﺅالدین کاشف جلیل، پھالیہ محمد عرفان ہنجر، ملکوال عثمان غنی، ڈائریکٹر جنرل پی ڈی ایم اے، ڈویژنل کوآرڈینیٹر ڈسٹرکٹ ڈیزاسٹر مینجمنٹ اتھارٹی ماجد خان، پراجیکٹ ڈائریکٹر پی ڈی ایم اے نثار احمد ثانی، ایس این اے نبیل قادر اور دیگر افسران بھی موجود تھے۔
سینئر ممبر بورڈ آف ریونیوپنجاب بابر حیات تارڑ نے کہاکہ ڈسٹرکٹ ایمرجنسی آپریشن سنٹرز کے قیام کا بنیادی مقصد قدرتی آفات اور ہنگامی صورتحال سے موثر طور پر نمٹنا ہے، انہوں نے بتایا کہ صوبہ کے تمام اضلاع میں ایمرجنسی آپریشن سنٹر کو جدید آلات و مشینری سے آراستہ کر کے ایمرجنسی آپریشن سنٹرز فنکشنل کردئیے گئے ہیں اور ان ایمر جنسی آپریشن سنٹرز کی سیٹلائٹ کے ذریعے مانٹیرنگ کی جائے گی۔
انہوں نے بتایا کہ ایمرجنسی آپریشن سنٹرز کی بدولت ضلع میں کسی بھی ہنگامی صورتحال کی براہ راست مانیٹرنگ سے قدرتی آفات،سانحات اور حادثات کے متعلق ڈیزاسٹر الرٹ اور وراننگ جاری کی جاسکے گی جبکہ ہنگامی صورتحال میں سرکاری اداروں اور کمیونٹی کے مابین درست معلومات کا تبادلہ اوراسٹیک ہولڈرز کی مشاورت سے مشترکہ حکمت عملی تشکیل دی جاسکے گی۔انہوں نے بتایاکہ آفات اور حادثات سے ہونے والے نقصانات کا اندازہ لگانے کیلئے ملٹی ہزرڈ ولنریبلٹی رسک اسیسمنٹ کے ذریعہ ڈیٹا مرتب کیا جائے گا۔
قبل ازیں سینئر ممبر بورڈ آف ریونیو کی زیر صدارت ڈی سی آفس کے لان میں ریونیو عوامی خدمت کچہری کا انعقاد ہوا۔ ایس ایم بی آر نے ریونیو عوامی خدمت کچہری میں آئے ہوئے سائلین سے توجہ اور خلوص سے ان کے مسائل سن کر درخواستوں پر حل کے لئے موقع پر احکامات جاری کئے۔انہوں نے کہاکہ عوام کے ریونیو سے متعلقہ مسائل کا ایک ہی جگہ پر فوری حل اولین ترجیح ہے، وزیراعلیٰ پنجاب سردار عثمان بزدار کی ہدایت کے مطابق سائلین سے براہ راست مسائل سن کر ون ونڈوآپریشن کے تحت حل کئے جا رہے ہیں۔
انہوں نے افسران کو ہدایت کی کہ وہ اوپن ڈور پالیسی کے تحت آنے والے سائلین کے مسائل کو بر وقت حل کریں کیونکہ عوامی مسائل کو حل کرنا ہی ہماری بنیادی ذمہ داری ہے ، انہوں نے کہا کہ ریونیو عوامی خدمت کچہری میں سائلین کی طرف سے پیش کردہ مسائل پر جاری کردہ احکامات پر بلا تاخیر عملدرآمد کو یقینی بنایا جائے ، اس سلسلہ میں کسی قسم کی غیر ضروری تاخیر ہر گز برداشت نہیں کی جائے گی۔
