ایڈیشنل ڈپٹی کمشنر ریونیو منڈی بہاءالدین ڈاکٹر احسان الحق ضیاءنے کہا ہے کہ ریونیو عوامی خدمت کچہریوں میں بہترین سہولیات کی فراہمی اولین ترجیح ہے ،وزیراعلیٰ پنجاب سردار عثمان بزدار کی ہدایت پر ریونیو عوامی سروسز کے ذریعے شہریوں کے مسائل کا فوری حل یقینی بنایا جا رہا ہے۔
منڈی بہاوالدین ( ایم.بی.ڈین نیوز یکم مارچ 2022 ) ان خیالات کا اظہار انہوں نے آج یہاں ڈی سی آفس میں منعقدہ ریونیو عوامی خدمت کچہری میں سائلین کی شکایات سن کر حل کرنے کے احکامات جاری کرتے ہوئے کیا۔ کھلی کچہری میں اسسٹنٹ کمشنر منڈی بہاﺅالدین کاشف جلیل، نائب تحصیلدار وقار احمد، لینڈ ریکارڈ سنٹر اور ریونیو افسران سمیت سائلین کی کثیر تعداد بھی موجود تھی۔
ایڈیشنل ڈپٹی کمشنر نے خدمت کچہری میں آئے ہوئے سائلین سے توجہ اور خلوص سے ان کے مسائل سن کر درخواستوں پر حل کے لئے موقع پر احکامات جاری کئے۔ انہوں نے کہاکہ عوام کے ریونیو سے متعلقہ مسائل کا ایک ہی جگہ پر فوری حل اولین ترجیح ہے، وزیراعلیٰ پنجاب سردار عثمان بزدار کی ہدایت کے مطابق سائلین سے براہ راست مسائل سن کر ون ونڈوآپریشن کے تحت حل کئے جا رہے ہیں۔
انہوں نے افسران کو ہدایت کی کہ وہ اوپن ڈور پالیسی کے تحت آنے والے سائلین کے مسائل کو بر وقت حل کریں کیونکہ عوامی مسائل کو حل کرنا ہی ہماری بنیادی ذمہ داری ہے ، انہوں نے کہا کہ ریونیو عوامی خدمت کچہری میں سائلین کی طرف سے پیش کردہ مسائل پر جاری کردہ احکامات پر بلا تاخیر عملدرآمد کو یقینی بنایا جائے ، اس سلسلہ میں کسی قسم کی غیر ضروری تاخیر ہر گز برداشت نہیں کی جائے گی۔
اسی طرح تحصیل پھالیہ اور ملکوال میں بھی متعلقہ اسسٹنٹ کمشنرز کی زیر صدارت ریونیو عوامی خدمت کچہریاں لگائی گئیں، خدمت کچہریوں میں آغاز سے لے کر اختتام تک آنے والے سائلین نے اپنے مختلف مسائل کے حوالے سے درخواستیں پیش کیں، جنہیں وہاں پر افسران کی موجودگی میں عملہ نے فوری طور پر کاروائی کر کے موقع پر نبٹا دیا جبکہ دیرینہ مسائل والی درخواستوں کو بھی جلد حل کرنے کی یقین دہانی کروائی گئی۔
