ڈپٹی کمشنر کی ہدایت پر اسسٹنٹ کمشنرز منڈی بہاﺅالدین امتیاز علی بیگ، اسسٹنٹ کمشنر پھالیہ ساجد منیر کلیار اور اسسٹنٹ کمشنر ملکوال عثمان غنی نے اپنی تحصیلوں میں سبزی وپھل منڈیوں کا اچانک دورہ کیا۔
منڈی بہاءالدین( ایم.بی.ڈین نیوز 16 ستمبر 2021) ڈی سی آفس میں پیش کی جانے والی رپورٹ کے مطابق آج علی الصبح تینوں اسسٹنٹ کمشنرصاحبان نے اپنی اپنی تحصیلوں کی سبزی منڈیوں کے دورے کے دوران مختلف دکانوں اور گوداموں کا معائنہ کرکے اپنی نگرانی میں پھلوں اور سبزیوں کی حکومت کے مقرر کردہ نرخوں پر نیلامی کروائی۔
انہوں نے سبزی منڈیوں میں خریداری کیلئے آنے والے دکانداروں اور صارفین سے اشیاءکی قیمتوں اور کوالٹی سے متعلق استفسار بھی کیا جس پر وہاں موجود صارفین نے اپنے اطمینان کا اظہار کیا۔ اے سی صاحبان نے کہاکہ وزیراعظم پاکستان عمران خان اور وزیراعلیٰ پنجاب عثمان بزدار کی ہدایت پر سبزیوں و پھلوں کی قیمتوں کو عوام الناس کو براہ راست ریلیف پہنچانے کیلئے کنٹرول کیا جا رہا ہے اور منڈی میں نیلامی کے عمل کی مسلسل مانیٹرنگ کی جا رہی ہے.
یہی وجہ ہے کہ تمام سبزیوں اور پھلوں کی قیمتوں میں استحکام کو برقرار رکھ کر مقرر کردہ نرخوں پرعملدرآمد کروایا جا رہا ہے جس کے ثمرات عوام تک پہنچ رہے ہیں۔انہوں نے آڑھتیوں اور نیلامی کے ممبران پر واضح کیا کہ صارفین کے حقوق کا خیال کرتے ہوئے عوام کی قوت خرید کے مطابق مقرر کردہ ریٹس پر ہی پھل اور سبزیاں فروخت کریں بصورت دیگر ناجائز منافع خوری پر سزا بھگتنا پڑے گی۔
