منڈی بہاءالدین میں جنگلات کا عالمی دن بھرپور طریقے سے منایا گیا

وزیر اعلی پنجاب مریم نواز شریف کے احکامات کی روشنی میں صوبہ بھر کی طرح ضلع منڈی بہاءالدین میں بھی ورلڈ فاریسٹ ڈے پھرپور طریقے سے منایا گیا۔ صوبائی وزیر ٹرانسپورٹ بلال اکبر خان، ممبر قومی اسمبلی ناصر اقبال بوسال اور ڈپٹی کمشنر ڈاکٹر فیصل سلیم نے ڈفر جنگل میں فیتہ کاٹ کر شجرکاری مہم کا باقاعدہ افتتاح کیا اور مہم کی کامیابی کیلئے دعا بھی کی۔

منڈی بہاءالدین (ایم.بی.ڈین نیوز 21مارچ 2025) ڈپٹی کمشنر ڈاکٹر فیصل سلیم نے بتایا کہ آج ڈفر جنگل میں بیک وقت 10 ہزار پودے لگائے جا رہے ہیں۔ انہوں نے بتایا کہ مجموعی طور پر آج کے دن میں ضلعی انتظامیہ کی جانب سے ضلع بھر میں ایک لاکھ 13 ہزار پودے لگائے جا رہے ہیں جبکہ 2 ہزار پودے عوام الناس میں تقسیم بھی کئے گئے۔

7000 ایکڑ پر مشتمل ڈفر جنگل کو عوامی تفریح گاہ بنایا جا سکتا ہے

صوبائی وزیر ٹرانسپورٹ بلال اکبر خان اور ممبر قومی اسمبلی ناصر اقبال بوسال کا کہنا تھا کہ وزیراعلی پنجاب مریم نوازشریف کی ہدایت پر صوبہ بھر میں ورلڈ فاریسٹ ڈے بھر پور طریقے سے منایا جا رہا ہے۔ وزیراعلی پنجاب کے “درخت لگائیں پاکستان کے لئے” نعرے کو کامیاب بنائیں گے۔

صوبائی وزیر اور ممبر قومی اسمبلی کا کہنا تھا کہ درخت ملکی معیشت، انسانی صحت کیلئے فائدہ مند اور بیماریوں سے نجات کا بڑا ذریعہ ہیں، اس کرہ ارض پر رہنے کیلئے درخت نہایت ضروری ہیں، آج یہاں ہمارے اکھٹا ہونے کا مقصد عوام الناس میں شجرکاری کا شعور اور آگاہی پیدا کرنا ہے۔

ان کا کہنا تھا کہ ہر ذمہ دار شہری کا یہ قومی اور اخلاقی فریضہ ہے کہ وہ اپنے گلی، محلوں اور کھلی جگہوں پر زیادہ سے زیادہ درخت لگائیں اور ان کی نگہداشت کیلئے شجرکاری کی اہمیت اور افادیت سے دوسروں کو بھی آگاہ کریں۔

صوبائی وزیر اور ممبر قومی اسمبلی نے افسران پر زور دیا کہ سکول، کالجز، ہسپتالوں اور سرکاری دفاتر میں زیادہ سے زیادہ پودے لگائے جائیں اور اپنے ارد گرد کے ماحول کو سرسبز بنانے کے لیے شجرکاری مہم میں اپنا حصہ ڈالیں تاکہ فضائی آلودگی کا خاتمہ کر کے شجرکاری مہم کو مستقل بنیادوں پر فروغ دیا جا سکے۔ انہوں نے عوام الناس سے اپیل کی کہ وہ شجرکاری مہم کو کامیاب بنانے کیلئے اپنا مثبت کردار ادا کرتے ہوئے انتظامیہ کا ساتھ دیں۔