سعودی عرب کی وزارت حج و عمرہ نے اعلان کیا ہے کہ نئے عمرہ سیزن سے بین الاقوامی زائرین کو عمرہ ویزے اسی وقت جاری کیے جائیں گے جب ان کی رہائش کی بکنگ “نسک مسار” ڈیجیٹل پلیٹ فارم پر رجسٹرڈ ہوگی۔
یہ فیصلہ 10 جون 2025 (14 ذی الحجہ 1446ھ) سے نافذ العمل ہے۔ اس کے تحت تمام عمرہ خدمات فراہم کرنے والے اداروں، کمپنیوں اور بین الاقوامی ایجنٹوں کو پابند کیا گیا ہے کہ وہ حجاج کے لیے صرف ان ہوٹلوں میں رہائش کا انتظام کریں جو وزارت سیاحت کے لائسنس یافتہ ہیں اور اس کی مکمل تفصیلات “نسک مسار” پلیٹ فارم پر اپ لوڈ کریں۔
وزارت حج و عمرہ نے واضح کیا کہ جو ادارے اس فیصلے پر عمل نہیں کریں گے انہیں ویزا میں تاخیر یا ریگولیٹری جرمانے کا سامنا کرنا پڑ سکتا ہے۔
یہ پالیسی سعودی عرب کے وژن 2030 کا حصہ ہے جس کا مقصد مذہبی سیاحت کے شعبے کو جدید ٹیکنالوجی اور اعلیٰ معیار کی خدمات کے ساتھ ترقی دینا ہے۔
“نسک مسار” پلیٹ فارم اب عازمین کے لیے عمرہ خدمات کا مرکزی ڈیجیٹل گیٹ وے بن گیا ہے، جہاں سے وہ نہ صرف ویزا اور رہائش کی بکنگ کر سکتے ہیں بلکہ مختلف زبانوں میں تعلیمی رہنمائی بھی حاصل کر سکتے ہیں۔
