اسلام آباد: نگراں وزیراعظم انوار الحق کاکڑ نے فلسطینیوں سے اظہار یکجہتی کے لیے سال نو کی تقریبات پر پابندی لگانے کا اعلان کردیا۔
نگراں وزیراعظم انوارالحق کاکڑ نے جمعرات کو ایک بیان میں کہا کہ تمام پاکستانیوں سے درخواست ہے کہ وہ غزہ کے متاثرین کے ساتھ اظہار یکجہتی کریں اور نئے سال کے موقع پر کسی بھی قسم کی تقریبات سے گریز کریں۔ سال 2024 کا استقبال سادگی سے کریں۔
انہوں نے کہا کہ مظلوم فلسطینیوں کے ساتھ اظہار یکجہتی کے لیے حکومت نئے سال کے حوالے سے کسی بھی قسم کی تقریبات پر مکمل پابندی عائد کر دے گی۔ یہ فیصلہ فلسطین کی تشویشناک صورتحال کو مدنظر رکھتے ہوئے کیا گیا ہے۔
وزیراعظم نے کہا کہ 7 اکتوبر سے قابض اسرائیلی افواج فلسطینیوں پر ظلم و ستم ڈھا رہی ہے۔ اب تک وہاں بچوں سمیت 21 ہزار سے زائد شہری شہید ہو چکے ہیں۔ پاکستانی قوم اور پوری امت مسلمہ فلسطینیوں کی نسل کشی پر شدید غمزدہ ہے۔
Special Message of Caretaker Prime Minister Anwaar-ul-Haq Kakar. pic.twitter.com/d5LDESJ2P5
— Prime Minister's Office (@PakPMO) December 28, 2023
انوار الحق کاکڑ نے کہا کہ پاکستان غزہ میں جاری خونریزی کو روکنے کے لیے بین الاقوامی سطح پر آواز اٹھا رہا ہے اور یہ سلسلہ جاری رکھے گا۔ ہم نے فلسطینیوں کے لیے دو امدادی کھیپیں بھیجی ہیں اور تیسری جلد بھیجیں گے۔
انوار الحق کاکڑ نے کہا کہ غزہ میں 9 ہزار بچوں سمیت 21 ہزار فلسطینی شہید ہو چکے ہیں۔ پاکستان نے دنیا کے ہر فورم پر مظلوم فلسطینیوں کے لیے آواز اٹھائی۔ انہوں نے کہا کہ فلسطینیوں کی مدد کے لیے جلد ہی تیسری امدادی کھیپ بھیجی جائے گی۔ وہ فلسطینیوں کی بروقت امداد اور غزہ سے محفوظ انخلاء کے لیے مصر اور اردن کے ساتھ رابطے میں ہیں۔
