ڈپٹی کمشنر تسنیم علی خاں نے کہا ہے کہ ضلع میں جاری تمام ترقیاتی سکیموں کو مقررہ ٹائم لائن کے اندر پایہ تکمیل تک پہنچایا جائے اور ان کے تعمیراتی معیار کو یقینی بنایا جائے تاکہ یہ منصوبہ دیرپا ثابت ہوں اور عوام الناس ان سے زیادہ سے زیادہ مستفید ہوں۔ انہوں نے کہاکہ ترقیاتی سکیموں کیلئے مختص فنڈز قوم کی امانت ہیں، جن کی ایک ایک پائی دیانت داری سے خرچ کی جانی چاہیے ۔
منڈی بہاﺅالدین( ایم.بی.ڈین نیوز 26 اگست2022) ان خیالات کا اظہار انہوں نے تحصیل پھالیہ پی پی 67 میں جاری ترقیاتی سکیموں کا تفصیلی معائنہ کرتے ہوئے کیا۔ایڈیشنل ڈپٹی کمشنر فنانس حافظ غلام مرتضیٰ، ایکسیئن ہائی وے، روڈز، ایم اینڈ آر، سابقہ چیئرمین بھواحسن لیاقت علی بھٹی، شجاعت حسین بھٹی اور دیگر متعلقہ محکموں کے افسران بھی موجود تھے۔
اس موقع پر مختلف منصوبوں پر تفصیلی جائزہ بھی لیا گیا۔ ڈپٹی کمشنر نے نے ان ترقیاتی منصوبوں پر فزیکل اور فنانشل پراگرایس رپورٹس کا بھی معائنہ کیا اور بعض تکنیکی رکاوٹوں کو دور کرنے اور مسائل کے حل پر ضروری ہدایات بھی جاری کیں۔انہوں نے ہدایت کی کہ جاری ترقیاتی سکیموں کے دوران تکمیل تک ان کے بار بار معائنے کو یقینی بنایا جائے۔
انہوں نے کہا کہ شہری سہولیات کی فراہمی کو یقینی بنانے کے لیے منظم منصوبہ بندی کے تحت ٹیم ورک کے تحت مطلوبہ نتائج کا حصول ممکن بنایا جائے۔ انہوں نے کہاکہ پنجاب حکومت ترقیاتی اسکیموں کی تکمیل کیلئے ہر ممکن وسائل مہیا کررہی ہے ۔ وزیراعلیٰ پنجاب کے صوبے بھر میں ترقیاتی کاموں کی وجہ سے صوبے بھر میں واضح تبدیلی نظر آرہی ہے۔
انہوں نے کہا کہ صوبائی حکومت سڑکوں اور دیگرز فلاحی منصوبہ جات کی تعمیرو توسیع کیلئے ہر ممکن وسائل اور فنڈز مہیا کر رہی ہے لہذٰا تمام منصوبے وقت پر مکمل کئے جائیں ۔ غیر ضروری تاخیر ہر گز برداشت نہیں کی جائے گی۔ انہوں نے مذید کہا کہ متعلقہ افسران اور انجینئرز ترقیاتی فنڈز کا بر وقت استعمال یقینی بنائیں اور ترقیاتی کاموں کی کوالٹی پر خصوصی توجہ دی جائے ، متعلقہ محکمے ذمہ داری کا مظاہرہ کریں کیونکہ جتنی جلدی ترقیاتی کام مکمل ہوں گے عوام الناس اتنی جلدی ہی ان سے مستفید ہوں گے۔
