منڈی بہاؤالدین سے سنی اتحاد کونسل کی پی پی 41 کی ایم پی اے بسمہ چوہدری نے امریکی جیل میں قید پاکستانی ڈاکٹر عافیہ صدیقی کی رہائی کے حوالے سے پنجاب اسمبلی میں اہم قرارداد جمع کرادی۔
قرارداد کے متن میں کہا گیا ہے کہ عافیہ صدیقی پاکستانی شہری ہیں۔ ان کی جان ومال کا تحفظ فیڈریشن آف پاکستان کی ذمہ داری ہے اور ہر پاکستانی شہری کو یہ حق حاصل ہے کہ وہ جہاں بھی ہو۔
امریکا میں قید عافیہ صدیقی کی 20 سال بعد بہن سے ملاقات
قرارداد میں لکھا گیا ہے کہ عافیہ صدیقی کے وکیل نے انکشاف کیا ہے کہ عافیہ پر نہ صرف جسمانی بلکہ جنسی تشدد بھی کیا جا رہا ہے۔ کیا ریاست پاکستان اپنی بیٹی کی اس بے حرمتی کو برداشت کر سکتی ہے؟ عافیہ صدیقی پر ذہنی دباؤ ڈالا جا رہا ہے اور اسے اس کے مذہب سے ہٹانے کی کوشش کی جا رہی ہے۔ اسے امام سے ملنے نہیں دیا جا رہا ہے۔
انہوں نے قرارداد میں لکھا کہ عافیہ صدیقی کو قانونی دفاع کے حق سے محروم کرنے کے لیے دستاویزات پر دستخط کرنے کی بھی اجازت نہیں دی جا رہی۔ ہم پاکستان کی بیٹی پر یہ ظلم و بربریت قبول نہیں کرتے۔
قرارداد میں مطالبہ کیا گیا ہے کہ عافیہ صدیقی کو وطن واپس لانے کے لیے بھرپور اور مخلصانہ کوششیں کی جائیں۔ یہ کوششیں صرف زبانی نہیں بلکہ عملی طور پر کی جانی چاہئیں۔ اسلام آباد ہائی کورٹ کے احکامات پر بلا تاخیر عمل کیا جائے۔
قرارداد میں مطالبہ کیا گیا کہ ڈاکٹر عافیہ صدیقی کو انسانی ہمدردی کی بنیاد پر ان کی بگڑتی ہوئی جسمانی اور ذہنی صحت کو مدنظر رکھتے ہوئے ہمدردی رہائی ایکٹ کے تحت رہا کیا جائے۔ ڈاکٹر عافیہ صدیقی بیس سال سے ناحق قید ہیں۔ وہ شدید بیمار ہیں اور کسی کے لیے خطرہ نہیں ہیں۔
وزیراعظم پاکستان خود امریکہ سے تحریری طور پر صدارتی معافی اور ہمدردی کی بنیاد پر رہائی کا مطالبہ کریں۔ قرارداد میں کہا گیا ہے کہ حکومت پاکستان فوری طور پر امریکی محکمہ خارجہ سے میڈیکل ٹیم کا معائنہ کرنے اور اپنی پسند کے امام سے ملاقات کرنے کی درخواست کرے۔
