ڈپٹی کمشنر شاہد عمران مارتھ اور ڈی پی او رضا صفدر کاظمی کی زیر صدارت ایکسیڈینٹل ریویو کمیٹی کا اجلاس منعقد ہوا۔ اجلاس میں سیکرٹری آر ٹی اے فریال نعیم، ڈسٹرکٹ ایمرجنسی آفیسر ریسکیو 1122عمران خان، ڈی ایس پی ٹریفک اور دیگر متعلقہ محکموں کے افسران نے شرکت کی۔
منڈی بہاوالدین ( ایم.بی.ڈین نیوز یکم اپریل 2024) ڈسٹرکٹ ایمرجنسی آفیسر ریسکیو 1122 عمران خان نے اجلاس کو بریفنگ دیتے ہوئے ضلع بھر میں پچھلے ایک ماہ کے دوران ہونے والے حادثات کی رپورٹ پیش کی۔ ان حادثات کے ہونے کی وجوہات پر تفصیلی گفتگو بھی کی گئی۔ حادثات ہونے کی نمایاں وجوہات میں ٹریفک قوانین کی لاعلمی اور ان پر عمل پیرا نہ ہونا ،لاپرواہی، بغیر ہیلمٹ موٹر سائیکل چلانا، تیز رفتاری اور کم عمر ڈرائیور وغیرہ ہیں۔
اجلاس میں ٹریفک حادثات کی شرح میں کمی لانے کیلئے مختلف تجاویز زیر بحث لائی گئیں۔ ڈپٹی کمشنر شاہد عمران مارتھ کا کہنا تھا کہ والدین میں اس بات کی آگاہی پیدا کی جائے کہ وہ اپنے کم عمر بچوں کو موٹرسائیکل اور گاڑی کی ڈرائیونگ نہ کرنے دیں۔
انہوں نے متعلقہ افسران کو ہدایت کی کہ بغیر فٹنس سرٹیفکیٹ، بغیر رجسٹریشن چنگچی رکشہ، بغیر ہیلمٹ موٹر سائیکل اور اوورلوڈ گاڑیوں کو کسی صورت بھی شاہراہوں پر نہ آنے دیا جائے اور خلاف ورزی کی صورت میں نہ صرف بھاری چالان کئے جائیں بلکہ ان گاڑیوں کو تھانوں میں بھی بند کر دیا جائے۔ ان اقدامات سے ہم ممکنہ ٹریفک حادثات میں کافی حد تک کمی لا سکتے ہیں۔
