پنجاب پولیس کے سپیشل آپریشن سیل نے ایک اور کامیابی حاصل کرتے ہوئے قتل کے مقدمہ میں مطلوب قمر عباس کو 5 سال بعد سعودی عرب سے گرفتار کر لیا۔ پنجاب پولیس نے قتل کے مقدمے میں پانچ سال سے مطلوب ملزم کو گرفتار کر لیا ہے۔
ترجمان پنجاب پولیس کے مطابق ملزم قمر عباس نے 2019 میں تھانہ پاہڑیانوالی کے علاقے میں فریقین کے درمیان سابقہ مقدمات اور زمین پر قبضے کے تنازع پر خاتون کو گولی مار کر قتل کیا تھا۔
ترجمان نے بتایا کہ اشتہاری قمر عباس منڈی بہاؤالدین پولیس کو 5 سال سے مطلوب تھا اور اسپیشل آپریشن سیل نے انٹرپول سے ملزم قمر عباس کا ریڈ نوٹس جاری کیا تھا۔ سعودی پولیس نے ملزم کو لاہور ایئرپورٹ پر گرفتار کرکے پنجاب پولیس کے حوالے کردیا جس کے بعد رواں سال بیرون ملک سے گرفتار ہونے والے خطرناک اشتہاریوں کی تعداد 82 ہوگئی۔
آئی جی پنجاب ڈاکٹر عثمان انور نے آر پی او گوجرانوالہ اور ڈی پی او منڈی بہاؤالدین کو مبارکباد دیتے ہوئے کہا کہ ملزمان کو قانونی کارروائی مکمل کرکے قرار واقعی سزا دی جائے۔ انہوں نے ہدایت کی کہ ایف آئی اے اور انٹرپول کی مدد سے دیگر خطرناک اشتہاریوں کو گرفتار کر کے وطن واپس لایا جائے۔
Leave a Reply