پاسپورٹ پرنٹنگ کا بحران ایک بار پھر شدت اختیار کر گیا۔ لیمینیشن پیپر کی قلت کے بعد سیاہی کا ذخیرہ بھی ختم ہوگیا۔ متعلقہ کمپنی کی جانب سے سیاہی بھیجنے میں تاخیر کی وجہ سے بحرانی صورتحال پیدا ہوگئی، پاسپورٹ کی پرنٹنگ کے لیے سیاہی کی کھیپ 28 جولائی کو اسلام آباد پہنچے گی۔
ڈی جی پاسپورٹ کی جانب سے کسٹمز حکام کو خط لکھا گیا ہے جس میں انک کنسائنمنٹ کو فوری طور پر کلیئر کرنے میں تعاون کی درخواست کی گئی ہے۔خط میں کہا گیا ہے کہ فنڈز کی کمی، کسٹم ڈیوٹی اور ٹیکس کی عدم ادائیگی کے باعث کسٹم کنسائنمنٹ فوری طور پر کلیئر نہیں ہوتی۔ پاسپورٹ کی پیداواری صلاحیت کو برقرار رکھنا مشکل ہے کیونکہ کنسائنمنٹ بروقت کلیئر نہیں ہوتے۔
28 جولائی کو آنے والی سیاہی کی کھیپ کو ترجیحی بنیادوں پر کلیئر کیا جائے۔ ڈی جی کی جانب سے خط میں مزید لکھا گیا کہ پاکستان کسٹمز تاخیر سے ادائیگی کی بنیاد پر سیاہی کی کنسائنمنٹ کو فوری طور پر کلیئر کرے۔
