نیویارک: کیلیفورنیا میں ٹریفک حادثے میں جاں بحق ہونے والے اسٹینفورڈ یونیورسٹی کے پاکستانی طالب علم کی نماز جنازہ کے بعد منڈی بہاؤالدین کے علاقے مانو چک میں تدفین کردی گئی۔
نوجوان اور ذہین طالب علم 22 سالہ اردشیر چدھڑ ایڈیشنل ڈسٹرکٹ اینڈ سیشن جج گوجرانوالہ چوہدری ظفریاب چدھڑ کا اکلوتا بیٹا تھا۔ اردشیر چدھر گزشتہ ہفتہ کی صبح اسٹینفورڈ یونیورسٹی کیمپس کے قریب ایک کار کی زد میں آکر ہلاک ہوگیا جب وہ اپنی الیکٹرک بائیک پر یونیورسٹی کیمپس جارہے تھے۔
یہ المناک حادثہ 31 مئی کی صبح 3 بجے سٹینفورڈ سٹیڈیم کے قریب پام ڈرائیو اور اربورٹم روڈ کے چوراہے پر پیش آیا۔اسٹینفورڈ یونیورسٹی کے طالب علم اردشیر کا تعلق پاکستان کے ضلع منڈی بہاءالدین کے گاؤں مانو چک سے تھا۔
اردشیر نے 2023 میں اپنے انسٹاگرام پیج پر لکھا تھا کہ وہ اسٹینفورڈ یونیورسٹی میں قانون کی تعلیم سے پہلے سیاسیات اور بین الاقوامی تعلقات کا مطالعہ کرنے کا ارادہ رکھتے ہیں۔ وہ تخلیقی تحریر، ادب اور چائنا اسٹڈیز میں بھی دلچسپی رکھتے ہیں۔
اسٹینفورڈ یونیورسٹی کے طلباء کے امور کے نائب پرووسٹ، مائیکل راسموسن نے یونیورسٹی کی ویب سائٹ پر ایک تعزیتی پیغام میں لکھا، “ہمیں اردشیر کی اچانک موت سے بہت دکھ ہوا ہے، جو ایک المناک ٹریفک حادثے میں ہلاک ہو گئے تھے۔” “ہم ان کے خاندان اور دوستوں سے اظہار تعزیت کرتے ہیں۔ میری لینڈ میں پیدا ہونے والے اردشیر 2023 کے موسم خزاں میں پاکستان سے سٹینفورڈ یونیورسٹی آئے تھے۔”
سٹینفورڈ میں رہتے ہوئے، اردشیر نے مختلف قسم کے علمی اور پیشہ ورانہ دلچسپیوں کی کھوج کی، جس میں الفا کاپا پی ایس آئی اور پری لاء سوسائٹی کی رکنیت بھی شامل ہے۔ اردشیر اسٹینفورڈ ڈیموکریٹس کے موجودہ صدر تھے۔ اردشیر نے یونیورسٹی کے اخبار “اسٹینفورڈ ڈیلی” کے لیے مضامین بھی لکھے۔
