گوجرانوالہ (سٹی رپورٹر) حکومت پنجاب نے گوجرانوالہ ڈویژن میں زیر التوا ترقیاتی منصوبوں کو جلد مکمل کرنے کا حکم دیتے ہوئے متعلقہ اداروں سے منصوبوں کا ریکارڈ طلب کر لیا۔ غفلت اور نااہلی کے مرتکب افسران کے خلاف کارروائی کی جائے گی۔
ذرائع کے مطابق گوجرانوالہ، سیالکوٹ، گجرات، منڈی بہاؤالدین، حافظ آباد اور نارووال کے ڈپٹی کمشنرز اور ترقیاتی اداروں کے سربراہان کو منصوبے کو بروقت مکمل کرنے کے لیے ٹاسک سونپ دیے گئے ہیں۔ گوجرانوالہ، سیالکوٹ، گجرات، منڈی بہاؤالدین، حافظ آباد اور نارووال میں وفاقی اور صوبائی محکموں سے منظور شدہ سینکڑوں ترقیاتی سکیمیں اس وقت تکمیل کے مراحل میں ہیں جن پر اربوں روپے خرچ کئے جا رہے ہیں۔
زیادہ تر منصوبے سڑکوں، گلیوں، سکولوں، قبرستانوں، سیوریج، نکاسی آب، پانی کی فراہمی کے ہیں۔ موصول ہونے والی اطلاعات کے مطابق صوبائی حکومت کی جانب سے فنڈز جاری ہونے کے باوجود بیشتر منصوبے تاخیر کا شکار ہیں جس کا حکومت نے سخت نوٹس لیا ہے۔ اس سلسلے میں افسران سے منصوبوں میں تاخیر کی وجوہات کے بارے میں وضاحت طلب کی گئی۔
