ایف آئی اے گوجرانوالہ زون کی کارروائی۔ یونان میں کشتی حادثے میں ملوث بدنام زمانہ انسانی سمگلر سمیت 2 ملزمان کو گرفتار کر لیا گیا۔ گرفتار ملزمان کے نام عمران شکور اور ظفر اقبال ہیں۔
ملزمان کو کھاریاں اور منڈی بہاؤالدین کے مختلف علاقوں سے گرفتار کیا گیا۔ ملزم عمران شکور یونان کشتی حادثے میں ملوث ہے۔ ملزم عمران شکور کو پہلے سے گرفتار ملزم کی خفیہ اطلاع پر گرفتار کیا گیا۔
گرفتار ملزم انسانی سمگلنگ میں ملوث گروہ کا اہم ایجنٹ ہے۔ ملزم نے دیگر ساتھیوں کی ملی بھگت سے مقتول احسن علی کو یورپ بھجوانے کے لیے 45 لاکھ روپے بٹورے۔ ملزمان نے دیگر ملزمان کی ملی بھگت سے متاثرہ لڑکی کو لیبیا میں محفوظ گھروں میں رکھا۔
بعد ازاں ملزمان نے متاثرہ لڑکی کو لیبیا سے کشتی کے ذریعے زبردستی یونان بھیجنے کی کوشش کی۔ کشتی حادثے میں زخمی ہونے والا احسن علی جاں بحق ہوگیا۔ مقتول احسن علی کا تعلق جلال پور جٹاں سے ہے۔ ملزم کے موبائل فون سے انسانی سمگلنگ سے متعلق اہم شواہد برآمد ہوئے ہیں۔
اشتہاری ملزم ظفر اقبال اٹلی میں نوکری کا جھانسہ دے کر شہری سے بھاری رقوم بٹورنے میں ملوث ہے۔ ملزمان نے شہری سے مجموعی طور پر 7 لاکھ روپے بٹورے۔ ملزم شہری کو بیرون ملک بھجوانے میں ناکام ہو کر روپوش ہو گیا۔
ملزمان کو گرفتار کر کے تفتیش شروع کر دی گئی۔ دیگر ملزمان کی گرفتاری کے لیے چھاپے مارے جا رہے ہیں۔ کشتی حادثات میں ملوث عناصر کے خلاف کریک ڈاؤن جاری ہے۔
ڈائریکٹر گوجرانوالہ زون عبدالقادر قمر نے کہا کہ ملزمان کی گرفتاری کے لیے تمام وسائل بروئے کار لائے جا رہے ہیں۔ انٹیلی جنس کی بنیاد پر انسانی سمگلروں کے خلاف کارروائیاں کی جا رہی ہیں۔