نگران پنجاب حکومت نے بم ڈسپوزل سکواڈ کو جدید ترین گاڑیوں سے لیس کر دیا ہے۔ 16 نئی بم ڈسپوزل ریسپانس گاڑیاں اور جدید آلات بم ڈسپوزل سکواڈ کے حوالے کر دیئے گئے۔
وزیراعلیٰ محسن نقوی نے سول سیکرٹریٹ میں 16 اضلاع کے بم ڈسپوزل کمانڈرز کو نئی بم ڈسپوزل ریسپانس گاڑیاں حوالے کیں۔ محسن نقوی نے بم ڈسپوزل ریسپانس کی نئی گاڑیوں کا معائنہ کیا اور جدید آلات کو دیکھا۔ انہوں نے بم ڈسپوزل سکواڈ کو جدید آلات سے لیس کرنے کے اقدام کو سراہا۔
نگراں وزیراعلیٰ پنجاب نے کہا کہ موجودہ حالات میں شہری دفاع کی اہمیت پہلے سے زیادہ بڑھ گئی ہے۔ جدید سہولیات اور آلات سے لیس گاڑیاں بم ڈسپوزل سکواڈ کی صلاحیتوں میں مزید اضافہ کریں گی۔ انہوں نے ہدایت کی کہ بم ڈسپوزل سکواڈ کو جدید آلات کی تربیت کا بھی انتظام کیا جائے۔
نئی بم ڈسپوزل ریسپانس گاڑیاں بھکر، چنیوٹ، گجرات، حافظ آباد، جہلم، خانیوال، خوشاب، لیہ، منڈی بہاؤالدین، مظفر گڑھ، ننکانہ صاحب، اوکاڑہ، پاکپتن، شیخوپورہ، ٹوبہ ٹیک سنگھ اور وہاڑی کے اضلاع کو دی گئی ہیں۔
