ضلع منڈی بہاءالدین کے انڈر 16فٹ بال کھلاڑیوں کیلئے خوشخبری، پاکستانی ٹیم کا حصہ بننے کا سنہری موقع، ڈپٹی کمشنر ڈاکٹر فیصل سلیم کی سربراہی میں فٹ بال کے فروغ اور نئے ٹیلنٹ کی تلاش کیلئے پاک آرمی ڈویژن گجرات و گوجرانوالہ اور سپورٹس ڈیپارٹمنٹ کے زیر اہتمام پاکستان انڈر 16فٹ بال ٹیلنٹ ہنٹ پروگرام کا انعقاد.
منڈی بہاءالدین،ڈسٹرکٹ سپورٹس آفیسر منڈی بہاءالدین ماجد حسین نے بتایا ہے کہ ڈپٹی کمشنر ڈاکٹر فیصل سلیم کی سربراہی میں فٹ بال کے فروغ اور نئے ٹیلنٹ کی تلاش کیلئے ضلع منڈی بہاءالدین سے تعلق رکھنے والے انڈر 16کھلاڑیوں کا انتخاب کیا جا رہا ہے۔
ایسے کھلاڑی جن کی تاریخ پیدائش یکم جنوری 2010کے بعد کی ہے، ان مقابلوں میں شرکت کیلئے تحصیل سپورٹس آفس میں اپنی اپنی رجسٹریشن کروا سکتے ہیں۔ انڈر 16کھلاڑیوں کے فٹ بال ٹرائلز تحصیل منڈی بہاءالدین قائداعظم فٹ بال گراﺅنڈ میں 16اور 17جنوری 2025 کو منعقد ہوں گے اور 18جنوری کو ملکوال اور پھالیہ کے کھلاڑیوں کے ٹرائلز پیر یعقوب شاہ سٹیڈیم پھالیہ میں ہوں گے جبکہ فائنل ٹرائلز 19جنوری کو قائداعظم فٹ بال گراﺅنڈ منڈی بہاءالدین میں منعقد ہوں گے۔
جس میں تینوں تحصیلوں کے بہترین کھلاڑیوں میں سے 20کھلاڑیوں کی انٹر ڈسٹرکٹ مقابلہ جات کیلئے سلیکشن ہو گی۔ ڈی او سپورٹس نے بتایا کہ یہ کھلاڑی ڈسٹرکٹ سے ڈویژن اورپھر پنجاب اور پاکستان لیول پر ٹیم کا حصہ بنیں گے۔ ڈسٹرکٹ سپورٹس آفیسر ماجد حسین کاکہنا تھا کہ پاکستان انڈر 16فٹ بال ٹیلنٹ ہنٹ پروگرام کا بنیادی مقصد سپورٹس کا فروغ ہے، نوجوان کھلاڑی مقابلوں میں اپنا ٹیلنٹ دکھا کر اپنا اور ملک پاکستان کا نام دنیا بھر میں روشن کر سکتے ہیں
