لاہور: موسلا دھار بارش کا سسٹم آج سے ملک میں داخل ہوگا، آج رات سے 30 جون تک ملک کے مختلف حصوں میں بارش کا امکان ہے۔پراونشل ڈیزاسٹر مینجمنٹ اتھارٹی (پی ڈی ایم اے) پنجاب کے مطابق عید پر بھی موسم خوشگوار رہنے کا امکان ہے، صوبائی کنٹرول روم اور اضلاع کے ایمرجنسی آپریشن سنٹرز کو الرٹ کر دیا گیا ہے۔
پی ڈی ایم اے کا کہنا ہے کہ آج رات سے 30 جون تک لاہور، اسلام آباد، راولپنڈی، مری، گلیات، اٹک، چکوال، جہلم، میانوالی اور سرگودھا میں بارش ہوسکتی ہے۔ حافظ آباد، منڈی بہاؤالدین، سیالکوٹ، نارووال، گوجرانوالہ، گجرات، شیخوپورہ، فیصل آباد، جھنگ، ٹوبہ ٹیک سنگھ میں بھی بارش ہوسکتی ہے۔
Be Ready For Pre-monsoon Showers In Pakistan Next Week
پی ڈی ایم اے کے مطابق 26 سے 29 جون تک ڈی جی خان، راجن پور، ملتان، بھکر، لیہ، کوٹ ادو، بہاولپور، بہاولنگر، ساہیوال، پاکپتن اور اوکاڑہ میں گرج چمک کے ساتھ بارش کا امکان ہے۔ موسلا دھار بارشوں سے لاہور، اسلام آباد، راولپنڈی اور گوجرانوالہ میں 26 اور 27 جون کو شہری سیلاب کا خدشہ ہے جب کہ مری میں لینڈ سلائیڈنگ بھی ہو سکتی ہے۔
پی ڈی ایم اے کا کہنا ہے کہ 27 جون کو ڈی جی خان میں سیلابی صورتحال کا خدشہ ہے، مسافر اور سیاح ناخوشگوار صورتحال سے بچنے کے لیے محتاط رہیں۔ حکام کا کہنا ہے کہ کاشتکار موسم برسات کے مطابق زرعی امور کا بندوبست کریں، ہوا کے باعث تیز بارش سے کمزور انفراسٹرکچر کو نقصان پہنچ سکتا ہے، بجلی کے کھمبے اور سولر پینل وغیرہ کو نقصان پہنچ سکتا ہے۔
