اسلام آباد: وفاقی دارالحکومت سمیت پنجاب کے بیشتر علاقوں میں رات بھر وقفے وقفے سے بارش کا سلسلہ جاری رہا۔ جڑواں شہروں راولپنڈی اور اسلام آباد میں رات بھر تیز اور دھیمی بارش کا سلسلہ جاری رہا۔ جس کے باعث جڑواں شہروں میں گرمی کا زور ٹوٹ گیا اور موسم سرد ہوگیا۔
صوبائی دارالحکومت لاہور میں بھی تیز اور دھیمی بارش سے نشیبی علاقے زیرآب آگئے۔ جبکہ درجہ حرارت 25 ڈگری سینٹی گریڈ تک گر گیا۔
منڈی بہاؤالدین سمیت بیشتر علاقوں میں گرج چمک کے ساتھ بارش کی پیشگوئی
پنجاب کے شہروں مریدکے، چکوال، تلہ گنگ، سانگلہ ہل، صفدر آباد، کاہنہ، اوکاڑہ، ننکانہ صاحب، بہاولنگر، گوجرانوالہ، قصور، شیخوپورہ، پتوکی، ساہیوال، کامونکی، میانوالی، منڈی بہاؤالدین، نارووال اور پسرور سمیت پنجاب کے دیگر شہروں میں بھی بارش ریکارڈ کی گئی۔
محکمہ موسمیات کے مطابق آج اور کل ملک کے بیشتر علاقوں میں گرج چمک کے ساتھ بارش کا امکان ہے۔ وقفے وقفے سے ہونے والی بارش سے بیشتر علاقوں میں بجلی کی ترسیل کا نظام بھی متاثر ہوا۔ جس کی وجہ سے شہریوں کو مشکلات کا سامنا کرنا پڑا۔
