ڈپٹی کمشنر تسنیم علی خاں نے کہا ہے کہ خصوصی افراد معاشرے کا اہم فرد ہیں جنہیں کسی بھی طرح نظر انداز نہیں کیا جا سکتا، یہ افراد خصوصی توجہ کے مستحق ہوتے ہیںاور ذرا سی توجہ سے یہ افراد ملک کے اہم شہری ثابت ہوسکتے ہیں۔ انہوں نے کہا کہ پنجاب حکومت معذور افراد کی بحالی ،تربیت اور بنیادی سہولیات کی فراہمی کے ساتھ ساتھ ان کی مالی امداد کیلئے تمام وسائل بروئے کار لا رہی ہے۔
منڈی بہاﺅالدین( ایم.بی.ڈین نیوز 30 اگست2022) ان خیالات کا اظہار انہوں نے ڈی سی آفس میں معذور افراد میں مالی امداد کے چیکس تقسیم کرنے کی تقریب سے خطاب کرتے ہوئے کیا۔ تقریب میں ایڈیشنل ڈپٹی کمشنر ریونیو ملک عباس ذوالقرنین ،ایڈیشنل ڈپٹی کمشنر فنانس حافظ غلام مرتضیٰ، ڈپٹی ڈائریکٹر سوشل ویلفیئر اینڈ بیت المال عاطف علی وڑائچ ،اسسٹنٹ ڈائریکٹر لیبر ثاقب حیات، چیئرمین بیت المال ہارون اصغر، خصوصی افراد کے نمائندے اورمعذورافراد بھی موجود تھے۔
اجلاس کو بریفنگ دیتے ہوئے ڈپٹی ڈائریکٹر سوشل ویلفیئر عاطف علی وڑائچ نے بتایا کہ حکومت کی جانب سے 26مستحق معذور افراد کی مالی امداد کے لیے فی کس 10ہزار روپے کے حساب سے2 لاکھ 60 ہزار مالیت کے امدادی چیکس تقسیم کئے جا رہے ہیں ۔انہوں نے بتایا کہ حکومت کی جانب سے معذور افراد کیلئے دیگر سہولیات جن میں خدمت کارڈ، سہولت ڈیسک ، ملازمتوں میں مخصوص کوٹہ اور سفری رعائت دی جا رہی ہیں۔
انہوں نے مذید بتایا کہ معذور افراد کو معاشرے کا مفید اور کارآمد شہری بنانے کیلئے ان کو صلاحیتوں کے اعتبار سے فنی تربیت بھی فراہم کی جا رہی ہے۔ڈپٹی کمشنر تسنیم علی خاں نے کہا کہ صوبائی حکومت خصوصی افراد کو دوسروں کی محتاجی سے نکال کر نارمل افراد کے ساتھ شانہ بشانہ روزگار کمانے کے قابل بنا رہی ہے۔
انہوں نے کہا کہ خصوصی افراد کا معاشرے کے دیگر افراد کے ساتھ ایسا ماحول اور تعلق پیدا کیا جائے کہ انہیں بھی نارمل انسانوں کی طرح معاشرے میں زندگی گزار نے پر کوئی دقت پیش نہ آئے۔تسنیم علی خاں نے کہاکہ حکومت اور ضلعی انتظامیہ کا پختہ عزم ہے کہ معاشرے کے کمزور طبقات اور معذوری کے شکار افراد کی بہتری اور بحالی کیلئے تمام ممکنہ اقدامات اٹھائے جائیں گے۔
