محکمہ موسمیات نے خبردار کیا ہے کہ ملک کے بیشتر علاقے آئندہ 10 روز تک شدید گرمی کی لپیٹ میں رہیں گے۔ تاہم ملک کے شمالی علاقوں میں گردو غبار، گرج چمک اور تیز بارش کا بھی امکان ہے۔
محکمہ موسمیات نے انتباہ دیا ہے کہ بالائی فضا میں ہائی پریشر کی موجودگی کے نتیجے میں ملک کے بیشتر حصوں بالخصوص پنجاب اور سندھ میں 21 مئی تک لُو چلنے (ہیٹ ویو) جیسی صورتحال ہوگی جس کی شدت 23 سے 27 مئی تک مزید بڑھ جائے گی۔
سندھ اور پنجاب میں 21 سے 23 مئی تک دن کے وقت کا درجہ حرارت معمول سے 4 سے 6 ڈگری سینٹی گریڈ زیادہ جبکہ 23 سے 27 مئی تک 6 سے 8 ڈگری سینٹی گریڈ زیادہ رہنے کی توقع ہے۔
اسلام آباد، خیبرپختونخوا، آزاد کشمیر، گلگت بلتستان اور بلوچستان میں 21 سے 27 مئی تک معمول کے دن کے درجہ حرارت سے 4 سے 6 ڈگری سینٹی گریڈ زیادہ رہنے کا امکان ہے۔ متعلقہ حکام کو الرٹ رہنے اور گرمی کی لہر سے نمٹنے کے لیے ضروری اقدامات کرنے کا کہا گیا ہے۔ .
خیبر پختونخوا میں چترال، دیر، سوات، ایبٹ آباد، مانسہرہ، ہری پور، کوہستان، شانگلہ، بونیر، مالاکنڈ، وزیرستان، کوہاٹ، لکی مروت، بنوں، ڈیرہ اسمٰعیل خان، باجوڑ، مہمند، کرک، خیبر، پشاور، چارسدہ، نوشہرہ، صوابی، مردان اور کرم میں بھی ایسا ہی موسم متوقع ہے۔
محکمہ موسمیات کا کہنا ہے کہ گزشتہ روز سب سے زیادہ گرمی نواب شاہ میں پڑی جہاں درجہ حرارت 49 ڈگری سینٹی گریڈ ریکارڈ کیا گیا۔ دادو 48، سکھر 46، حیدرآباد، بہاولپور 45، لاہور، ملتان، ساہیوال، سرگودھا، 44 جبکہ فیصل آباد میں درجہ حرارت 43 ڈگری سینٹی گریڈ ریکارڈ کیا گیا۔
