ڈی ایچ کیو ہسپتال کی مینٹیننس اور دیگر مسائل کے حل کیلئے ایک خصوصی کمیٹی تشکیل

ڈپٹی کمشنر شاہد عمران مارتھ کی زیر صدارت ڈسٹرکٹ ہیلتھ کونسل کا اجلاس ڈی سی آفس کے کانفرنس روم میں منعقد ہوا۔ اجلاس میں ایڈیشنل ڈپٹی کمشنر فنانس حافظ غلام مرتضیٰ،سی ای او ہیلتھ ڈاکٹر عابد یوسف ،ایکسیئن بلڈنگ سید کرار حسین شاہ، میڈیکل سپرنٹنڈنٹ ڈاکٹر خالق داد نسوانہ، ڈسٹرکٹ ہیلتھ آفیسرز سمیت دیگر ممبران نے شرکت کی۔

منڈی بہاوالدین( ایم.بی.ڈین نیوز 24 نومبر 2023) شرکائے اجلاس کی متفقہ رائے کے بعد21 سٹاف ملازمین ،9 ڈیٹا اینٹری آپریٹرز کی نومبر کی تنخواہوں کی ادائیگی ، ڈیٹا اینٹری آپریٹرزکے جولائی تا اکتوبر بقایا جات کی ادائیگی،02 پرنٹرزکی خریداری، ایمبولینس کی مرمت اور مختلف ادائیگیوں سمیت دیگر طبی سہولتوں کی فراہمی کی منظوری دی گئی۔

اس موقع پر ڈپٹی کمشنر شاہد عمران مارتھ کا کہنا تھا کہ وزیر اعلیٰ پنجاب کی ہدایت پر تمام ہسپتالوں میں بہترین طبی سہولیات کی فراہمی کو یقینی بنانے کے ساتھ ساتھ اپ گریڈ بھی کیا جا رہا ہے۔ڈسٹرکٹ ہیلتھ کونسل کے اجلاس کا بنیادی مقصد ڈی ایچ کیو ہسپتال میں عوام الناس کو بہترین اور معیاری طبی سہولیات کی فراہمی اور دیگر مسائل کو حل کرنا ہے۔

ڈپٹی کمشنر نے ڈی ایچ کیو ہسپتال کی مینٹیننس اور دیگر مسائل کے حل کیلئے ایک خصوصی کمیٹی تشکیل دینے کی ہدایت کی جو ڈسٹرکٹ ہیلتھ کونسل کے بجٹ کو پوری ایمانداری اور نیک نیتی سے خرچ کرے گی۔