ماہر غزانیات ڈاکٹر وردہ سکندر نے کہا ہے کہ خدمت خلق ان کا مشن ہے جنہیں وہ ہر طرح سے نبھانے کی پوری کوشش کرتی ہیں، انہوں نے کہا کہ ڈاکٹر مسیحا ہوتے ہیں، جس نے ایک انسان کی جان بچائی گویا اس نے پوری انسانیت کو بچایا۔
منڈی بہاﺅلدین( ایم.بی.ڈین نیوز 30 اکتوبر 2022) ان خیالات کا اظہار انہوں نے میاں وحیدالدین پارک کے گیٹ کے سامنے ایک روزہ فری میڈیکل کیمپ میں مریضوں کا علاج معالجہ کرتے ہوئے کہا۔ اس موقع پر ڈاکٹر فصاحت حسین، ڈاکٹر حافظ عزیر, ڈاکٹر نور بابر، ڈاکٹر اطروبہ اسلم، ریٹائرڈ بنک مینجر سکندر اعظم اور مریضوں کی کثیر تعداد بھی موجود تھی۔
ڈاکٹر وردہ سکندر نے کہا کہ انسانیت کی خدمت کے جزبے سے ہی وہ اس فیلڈ میں آئی ہیں اور ان کی پوری کوشش ہوتی ہے کہ مریضوں کے ساتھ ہمیشہ محبت اور شفقت والا رویہ اپنایا جائے کیونکہ ایسا کرنے سے مریضوں کی آدھی بیماری فوری ختم ہو جاتی ہے۔
انہوں نے بتایا کہ ایک روزہ فری میڈیکل کیمپ میں مفت طبی معائنہ، حاملہ اور دودھ پلانے والی مائوں کا چیک اپ، بچوں کی نشوونما، موٹاپے کا خاتمہ، وزن بڑھانا، شوگر، پی سی او ایس، بلڈ پریشر، دل کا عارضہ، معدے کے مسائل، جگر اور گردے کی بیماریاں، لیکٹوز انٹولیرنس، سیلیک کی بیماری، کٹے ہونٹ تالو والے بچے، گنٹھیا، جوڑوں کا درد اور خواتین کے پیچیدہ امراض جیسے مسائل کے حل اور ادویات مفت مہیا کی جا رہی ہیں۔
ان کا کہنا تھا کہ فری میڈیکل کیمپ کا مقصد عوام الناس کی صحت کیلئے طبی سہولیات کے ساتھ غریب اور نادار افراد کیلئے مفت ادویات کی فراہمی اور صحت کے حوالے سے آگاہی فراہم کرنا ہے جوکہ انشاءاللہ ہر مہینے کے پہلے ہفتے میں بھی یہ سلسلہ جاری رہے گا۔